Bankuei etxebizitzak kentzeko lege nafarra, bertan behera

Auzitegi Konstituzionalak bertan behera utzi du gaur etxegabetzeak saihesteko banketxeei etxebizitzak kentzea ahalbidetzen zuen lege nafarra.

Konstituzionaleko iturriek jakitera eman dutenez, Espainiako Gobernuak irailean "etxegabetzeen kontrako" legearen aurka jarri zuen helegitea aintzat hartu ostean iritsi da erabakia.

Zehazki, lege horren 1, 2, 5 ,6 eta 7. artikuluen kontra jarri zuen Espainiako Gobernuak helegitea, Estatuaren diren eskumenak urratzen dituela argudiatuta. Ondorioz, 161.2 artikulua oinarri hartuta legea bertan behera uztea eskatu zuen.  Gobernuak helegite horretan defendatu zuenez, etxebizitzarako oinarrizko eskubidea ezin da erkidegoek etxebizitza eta hirigintza arloan dituzten eskumenetan integratu, behintzat espainiar guztien berdintasunaren  oinarrizko eskubideari eragiten dionean.

Auzitegi Konstituzionalak erabakia helarazi eta 15 eguneko epea eman dio Nafarroari alegazioak jartzeko.

Nafarroako parlamentuak ekainaren 27an onartu zuen legea, PSNren, Bilduren, Aralar_Nabariren eta I-Eren aldeko botoekin. UPNk eta PPk kontra bozkatu zuten.

Andaluzian ere

Joan den uztailean, etxegabetzeen kontra Aldaluziak onartutako dekretua ere utzi zuen bertan behera Auzitegi Konstituzionalak.