Gizartea -
Elkarrizketa
Uriarte: 'Neurri sendoak hartuko ditugu LOMCE ez aplikatzeko'
Eusko Jaurlaritzaren Hezkuntza eta Kultura sailburuak ez du uste legea, Kongresutik pasatu eta gero, "asko aldatuko denik, Werten jarrera ikusita, ez du orain bat-batean dena hankaz gora jarriko".
Manu Gimenez
Cristina Uriarte Eusko Jaurlaritzaren Hezkuntza eta Kultura sailburuak adierazi du Espainiako Gobernuak baino "neurri sendoagoak" hartuko dituztela bihar aurkeztuko duten LOMCE hezkuntza legea "hemen ez aplikatzeko".
Hezkuntza sailburuak Hezkuntza lege berria izan du hizpide ETB-1eko Egunon Euskadi saioan egindako elkarrizketa batean.
Haren esanetan, "ez da ia ezer" aldatu duela bost hilabete José Igancio Wert Hezkuntza ministroarekin bildu zenetik, eta "kontra egiten jarraituko" dute.
Euskarari egingo dion kalteari dagokionez, Uriartek gogorarazi du erkidegoena dela "hizkuntza ofizialak arautzeko eskumena", eta lege berriak "horixe urratzen du".
Gainera, murrizketak nagusi diren garai honetan hezkuntza lege berria abian jartzeko arazoak izango direla aitortu du Uriartek, "askoz gastu handiagoa suposatuko du eta agian ezin izango dugu aplikatu".
Greba
CC.OO eta UGT sindikatuek Estatu osoko hezkuntzan deitu duten grebaz galdetuta, sailburuak uste du "eragin gutxi" izango duela, "egin beharra dagoena kontra gaudenon lana batu eta ados jartzea" dela iritzi dio.
