Hendaiako ikastolari diru-laguntza publikoa debekatu dio Baionak

Baionako suprefetak Hendaiako ikastolari diru-laguntza publikoa ematea debekatu dio udalari. Erabakia 1850. urteko lege batean oinarrituta dago. Lege horren arabera, ezin zaie eskola pribatuei inolako diru publikorik eman.

Hur Gorostiaga Seaskako zuzendariak Berria egunkariari adierazi dionez, "eraso bortitza da, gerra deklarazioa". Izan ere, Hendaiako ikastolari egoitza txiki geratu zaio eta erakin berria egiteko proiektua mahai gainean dute aspalditik. Suprefetaren erabakiak proiektua kolokan utzi du.

Seaskako ikastolentzat, hil ala bizikoa da laguntza publikoa jasotzea. Gorostiagak azaldu duen bezala, Itsasuko ikastola, adibidez, "osorik ordaindu du udalak". Seaskako zuzendariak, gainera, salaketa zuzena egin du, bere ustez ikastolak laguntzeko debekua suprefetaren gainetik iritsi da, Paueko prefetatik, hain zuzen.

Hendaiako ikastolako arduradunek, erabakiaren kontrako mobilizazioak iragarri dituzte. Astelehenean prentsaurrekoa emango dute erabakiaren inguruko zehaztasunak emateko.

Gorostiagak adierazi duenez, "ezin dugu onartu gure zentro gehienak ixtea", eta iparraldeko ikastola guztiak mobilizazioetan parte hartzeko prest daudela gaineratu du.