Etxegabetzeak -
Exekutiboaren datuak
26.000 familiak Gobernuarengana jo dute, kaleratzeak saihesteko
Familia horiek guztiek Rajoyren Exekutiboak onartutako neurri bereziak erabili dituzte, tartean etxea ordainerako ematea, euren egoerari irtenbide bat emateko.
Erredakzioa
Estatu espainiarreko 26.000 familiak Gobernuarengana jo dute etxegabetzeak saihesteko, gaur Luis de Guindos Ekonomia ministroak jakitera eman duenez. Familia horiek guztiek Rajoyren Exekutiboak onartutako neurri bereziak erabili dituzte euren egoerari irtenbide bat emateko, tartean etxebizitza ordainerako ematea. Askotan, hipoteka sinatzerakoan izandako “gardentasun faltak” ematen dira “etxegabetze egoerak”, ministroaren hitzetan.
Kongresuko kontrol saioan, Miguel Angel Heredia sozialistak hipoteka ordaindu ezin duten familien etxegabetzeen aurka “zerbait egitea” aurreikusi duen galdetu dio Ekonomia ministroari.
Erantzuteko txandan, De Guindosek esan du Rajoyren Gobernua “lehenengoa izan dela” krisiak kolpatutako familiei laguntza ematen. Exekutiboak onartutako neurri esker, zorraren berregituraketa egin dute mila bat pertsonek, beste 3.000 lagunek etxebizitza ordainerako eman dute, 1.400 alokairu sozial lortu dira eta 12.000 kaleratze saihestu dituzte.
Hala ere, arazoaren aurrean “partxeak jartzea” egotzi dio Herediak Rajoyren Gobernuari. “Bankuak eta pertsonak aukeran, bankuak erreskatatzea erabaki duzue”, gaineratu du.
“Ezin da jenderik gabeko etxebizitzarik izan behar, ezta etxerik gabeko pertsonarik. Ibilgailu ofizialetik jaitsi, kaletik ibili, errealitatea ezagutu, eta herritarrek nahi duten kaleratze bakarra Mariano Rajoyrena dela ikusiko duzu”, gaineratu du diputatuak.
