PAHko kideak Senatutik bota dituzte, etxegabetze legea onartu ondoren

Etxegabetzeen kontrako plataformako 20 bat kide Senatutik kaleratu dituzte asteazken honetan, bertan kaleratzeen kontrako legea bozkatu eta behin betiko onartu ondoren. ''Hilketa gehiagorik ez'' mezua zeraman pankarta erakutsi dute elkarteko kideek, eta senatarien kontrako oihuak bota dituzte.

Hala, ''kriminalak'', ''hiltzaileak'' eta ''jendea gosez hiltzen da'' oihu artean atera dituzte Senatutik.

Senatuaren kanpoaldean ere plataformako kideak bildu dira, bost orduz, barruan legea eztabaidatu duten bitartean.

Legea behin betiko onartu dute

Senatuaren osoko bilkurak behin betiko onartu du etxegabetzeen kontrako legea, PPren aldeko botekin bakarrik. PSOEk, PSCk eta ICVk hiru beto aurkeztu dituzte, eta, guztira, 275 zuzenketa partzial egon dira, Guztiak, baina, albo batera bota dituzte.

Etxegabetzeen kontrako legea ia itxita iritsi zen Diputatuen Kongresura, kaleratzeen inguruan Gobernuak egindako proposamena eta legegintzako herri ekimena uztartu ondoren, PPk berak 50 bat aldaketa sartuta.