Legatza, euskal arrandegietako izarra

Azken hamarkadan arrain gutxiago jaten dugula diote ikerketa guztiek, baina gustukoen dugun arrain espeziea ez da aldatu EITB Data azterketaren arabera. Euskal Autonomia Erkidegoan eta Nafarroan gehien jaten den arraina legatza da, 2014an bezala. Estatuan ere legatza da arrain kontsumituena.

Hortik aurrera, gustuak erkidegoen araberakoak dira. Araban, Bizkaian eta Gipuzkoan garaian garaiko arrainak oso preziatuak izan ohi dira. Antxoa eta hegaluzea gehien jaten diren bost arrainen zerrendan agertzen dira, izokinarekin eta bakailaoarekin batera.

Nafarroan, aldiz, akuikulturako arrainak kontsumitzen dira gehien-gehien. Izokina, lupia eta urraburua antxoak eta sardinak baino gehiago jaten dira.

Urtean joan eta urteak etorri, arrain motak ere aldatu egin dira. Azken hamarkadako datu orokorrei begiratuz gero, espezie gehienak gutxiago erosten badira ere, akuikulturako arrainen kontsumoak gora egin du, batik bat, izokinarenak, lupiarenak eta urraburuarenak.

Itsaskiei eta moluskuei dagokionez, ganbak eta otarrainxkak dira ohikoenak gure mahaietan. Multzo horretako produktuen kontsumoaren herena dira. Gutxiago jaten dira txipiroien familiakoak eta olagarroa.

Azkenik, kontserben merkatuari begiratuta, hegaluzea da nagusi. EAEko eta Nafarroako biztanleko, batez beste, 2 kilo jaten diraurtean. Muskuiluak, sardinak eta izokin ketua, esate baterako, askoz gutxiago jaten dira.

Arraina erosteko formatuari erreparatuta, nabarmen nahiago izaten da arrain freskoa Hego Euskal Herrian. Erositakoaren % 86 freskoa izaten da, eta % 13, izoztua.

Estatuan ere nahiago izaten dute arrain freskoa baina arrain izoztu gehiago jaten dute, % 21, hain zuzen ere.