Ekonomia -
Automobilgintza
Volkswagen Navarrako zuzendaritzak 2025erako 60 egun baino gehiagoko lan-erregulazioa planteatu du
Hurrengo urterako egutegiak hiru itxialdi luze izango ditu: urtarrilekoa, ekoizpena hilaren 23an abiatuko litzatekeena; udakoa, uztailaren 2tik abuztuaren 20ra artekoa; eta abendukoa, hilabete osoan produkziorik egongo ez litzatekeena, ibilgailu elektrikora egokitzeko lanak direla eta.
EITB Media
Volkswagen Navarra lantegiko zuzendaritzak 2025erako urteko 209 lan-eguneko egutegia eta 220.000-230.000 autoko ekoizpena planteatu dizkio enpresa-batzordeari gaur.
Enpresa-batzordeak berak jakinarazi duenez, hurrengo urterako egutegiak hiru itxialdi luze izango ditu: urtarrilean, ekoizpena hilaren 23an hasiko litzateke; udan, uztailaren 2tik abuztuaren 20ra; eta abenduan, hilabete osoan ez litzateke produkziorik egongo, ibilgailu elektrikora egokitzeko egingo diren lanak direla eta.
Guztira, 65,5 egun inguru aldi baterako lan erregulazioko espedientean (ERTE).
Horrela, egun horietarako, zuzendaritzak ERTE akordio bat adostea proposatu du, orain arte egin den bezala.
"Lanaldia eta oporrak finkoak dira guztientzat", UGTren ohar baten arabera. Sindikatuak zuzendaritzari jakinarazi dio ERTEaren akordiorako egun hauetan ordu-plusaren ordaintzea eskatzeko asmoa duela, aurretik adostutakoaz gain, hau da, soldata osagarria eta antzinatasuna.
Bestalde, UGTk helburuen eta errendimendu indibidualaren ordainsaria urtarrilera aurreratzea eskatu du bileran. "Helburuen ordainsaria aurreratuko dutela baieztatu digu zuzendaritzak. Orain nola egin aztertzen ari dira", azpimarratu du sindikatuak.