EAEko erakundeek eta Espainiako Gobernuak autogobernu ekonomikoa handitzea adostu dute

Kontzertu Ekonomikoaren Batzorde Mistoak (Eusko Jaurlaritzak, foru aldundiek eta Espainiako Gobernuak osatzen dute) akordioa lortu du gaur Kontzertu Ekonomikoa erreformatzeko.

Hitzarmenak Kontzertu Ekonomikoaren hogei bat artikuluri eta bi xedapen gehigarriri eragiten die, eta aukera emango du, besteak beste, EAEko erakundeek nazioarteko finantza-foroetan parte hartzeko, hala nola ECOFINen eta OCDEren goi-mailako bileretan.

Gainera, foru-ogasunek autonomia handiagoa izango dute 14 zergaren kudeaketan, tartean BEZean, eta autonomia osoa izateko eskubidea izango dute Ez-egoiliarren Errentaren gaineko Zergari dagokionez.

Asteazken honetan egindako bilera telematiko batean heldu dira akordiora.

Orain arte, Ez-egoiliarren Errentaren gaineko Zerga, EAEn bizi ez diren baina autonomia-erkidegoan errentak kobratzen dituzten pertsonei aplikatzen zaiena (adibidez, Euskal Autonomia Erkidegoan kontzertu bat egiten duen atzerriko abeslari bat), Estatuan jarduera ekonomiko iraunkorra duten zergadunei aplikatzen zitzaien Espainiako araudiaren arabera arautzen zen.

Horrek eragotzi egiten zuen, adibidez, atzerriko inbertitzaileek EAEn ikus-entzunezko produkzioak filmatzea bultzatzeko pizgarri fiskalak jasotzea. Gaur lortutako akordioak autonomia emango die euskal erakundeei zerga horri buruz erabakitzeko ahalamen osoa izateko, eta, iragarri dutenez, atzerriko inbertsioa handitzea ekar lezake, Ogasun eta Finantza Saileko iturriek azaldu dutenez.

Aitor Esteban EAJk Kongresuan duen bozeramaileak akordioa nabarmendu du, eta euskal erakundeak Europako nazioarteko erakunde garrantzitsuetan egotea "funtsezkoa" dela azpimarratu du, "une honetan Europako fiskalitate berri bat prestatzen ari delako". Halaber, akordio horiek Pedro Sanchez Espainiako Gobernuko presidentearen inbestidurarako adostu ziren "edukiak pixkanaka betetzen" ari direla azpimarratu du.