Ekonomia -
INFLAZIOA
KPIa zortzi hamarren apaldu da irailean, % 1,5era arte, eta 2021eko martxotik izan duen tasarik txikiena da
Bestalde, azpiko inflazioa hiru hamarren jaitsi da irailean, % 2,4raino. Hortaz, KPI orokorra baino bederatzi hamarren handiagoa da, eta 2022ko urtarriletik izandako txikiena.
O. A. | EITB Media
Prezioek gora egiten jarraitzen badute ere, Kontsumoko Prezioen Indizearen (KPI) urte arteko tasa zortzi hamarren apaldu da irailean, % 1,5era arte. Gauzak horrela, 2021eko martxotik izan den tasarik txikiena da, orduan % 1,3an kokatu baitzen.
Espainiako Estatistika Institutuak gaur aurreratutako datuen arabera, batez ere, erregaien merkatzeak eragin du prezioen apaltzea. Hala ere, neurri txikiagoan bada ere, eragina izan du elikagaiak eta elektrizitatea iaz baino merkeagoak izateak.
Gauzak horrela, lau hilabete daramatza segidan beherazko bidean, maiatzean % 3,6an jarri ondotik (% 3,4 ekainean, % 2,8 uztailean eta % 2,2 abuztuan).
Abuztutik irailera, berriz, prezioak sei hamarren merkatu dira.
Azpiko inflazioa (energia eta elikagai freskoak kontuan hartzen ez dituena) hiru hamarren jaitsi da irailean, % 2,4raino. Hortaz, KPI orokorra baino bederatzi hamarren handiagoa da, eta 2022ko urtarriletik izandako txikiena.
Iraileko datu aurreratua urriaren 15ean baieztatuko du Espainiako Estatistika Institutuak.