Ekonomia -
Eusko Jaurlaritza
Mikel Torres lehendakariordeak bilera-sorta egingo du eragile sozialekin, astelehen honetatik aurrera
Lehenengo batzarra LABekin izango da, eguerdian, eta hasi berri den legegintzaldiko erronka nagusiak izango dituzte hizpide.
agentziak | eitb media
Mikel Torres Ekonomia, Lan eta Enplegu sailburu eta lehendakariordeak astelehen honetan, irailaren 2an, ekingo dio eragile sozialekin egingo duen bilera-sortari, hasi berri den legegintzaldiko erronka nagusiak hizpide, tartean 2025eko aurrekontuetarako lehentasunak.
Batzarretan, Torresekin batera, Elena Perez Barredo Laneko eta Gizarte Segurantzako sailburuordea, Alfonso Gurpegui Enplegu eta Gizarteratze sailburuordea eta Iñaki Ruiz Ekonomia eta Europako Funts sailburuordea izango dira.
Lehenengo bilera LAB sindikatuarekin izango da, 12:00etan Eusko Jaurlaritzaren egoitzan, Gasteizen. Asteartean, berriz, CCOOren (12:00) eta UGTren (13:30) txanda izango da.
Asteazkenean Bilbon izango dira batzarrak, 09:00etan Confebask patronalarekin eta 13:00ean ELA sindikatuarekin.
