Ekonomia -
Heidelberg Materials
Cementos Rezolako langileek greban jarraituko dute enpresak 'kaleratze traumatikoak' gauzatuko dituelako
Hala bada, abuztuaren amaieran bi hilabete beteko ditu grebak. Hala ere, LABek eta ELAk adierazi dute Heidelberg Materialseko zuzendaritza garaiz dagoela oraindik "erabakia aldatzeko".
AGENTZIAK | EITB MEDIA
Donostiako Cementos Rezolako langileek grebarekin jarraitzea erabaki dute. Greba ekainaren 28an abiatu zuten, enpresak Enplegu Erregulazioko Espedientea (EEE) aurkeztu zuenean. LAB sindikatuak kaleratutako ohar baten bitartez, langileek uste dute enpresak kaleratze "traumatikoak" egingo dituela.
Hain zuzen ere, plantillaren erdia baino gehiagori eragiten dio Heidelberg Materials konpainiak aurkeztutako EEEa, 56 langileri.
"Kaleratze traumatikorik ez egotea izan da, hasieratik, akordio baterako gure baldintza, eta ez da horrela gertatu. Ez da irteerak borondatezkoak izango direnik bermatzen, eta, gainera, enpresak hautatutako langile batzuk gainerakoak baino baldintza okerragoetan kaleratu nahi dituzte", salatu du LABek.
Hala ere, sindikatuak adierazi du enpresako zuzendaritza garaiz dagoela oraindik "erabakia aldatzeko", hartutako erabakia abuztuaren 31n jarriko baita martxan.
Nahiz eta aurreko astelehenean Alemaniako konpainiak eragindako 56 langileetatik 51k enpresaren eskaintzari heldu diotela azaldu, LABek eta ELAk uste dute langileen erabakia ez dela borondatezkoak izan. Horrenbestez, grebak aurrera jarraituko du.
Ia bi hilabeteko greba
Ekainaren 10ean, porlan fabrikazioaren deskarbonizazio-prozesu baten barruan klinkerraren ekoizpena geldiarazi zela iragarri ondoren, lantegiko zuzendaritzak hilaren 18an jakinarazi zuen geldialdi horren ondoriozko espediente batek 56 langileri eragingo ziela.
Heidelberg Materialsek jakinarazi zuen "behargin guztientzako lan-alternatiba" diseinatu duela, eta 15 aurre-erretiro, 30 barne-birkokatze (konpainiako beste lantegi batzuetan) eta 11 kanpo-birkokatze eskaini zituela.
