Ekonomia -
OSAKIDETZA
Osakidetzak orduko 70 euro ordainduko dizkie udan lan egiten duten familia medikuei aparteko orduak
Gainera, azken hiru hilabeteetan mediku egoiliar izan direnak kontratatzea proposatu du, batez ere Lehen Mailako Arreta indartzeko. Euskadiko Medikuen Sindikatuaren ustez, "jarrera aldaketa" egon da Osasun Zerbitzuaren Zuzendaritzaren aldetik.
EITB MEDIA
Osakidetzak orduko 70 euro ordainduko dizkie udan lanaldia luzatzen duten familia medikuei, betiere gutxienez bi ordu luzatzen badute.
Hori da EAEko Osasun Zerbitzuaren zuzendaritza berriak udako oporretan medikuen gabezia arintzeko proposatutako neurrietako bat.
Hala, asteburu honetatik irailaren 30era lan ordutegia luzatzen duten medikuek gehiago kobratuko dute.
Horrez gain, kontratuak eskainiko dizkie formakuntza aldiaren azken hiru hilabeteetan dauden mediku egoiliarrei. Baldintza horiek onartzen dituzten egoiliarrek medikuen ordainsari bera jasoko dute.
Osakidetzatik adierazi dutenez, aparteko neurriak dira horiek, urgentziazkoak, eta osasun zentroak irekita mantentzen laguntzea dute helburu.
Euskadiko Medikuen Sindikatuak pozik hartu du erabakia, eta Osasun Zerbitzuaren zuzendaritzan "jarrera aldaketa" izan dela nabarmendu du.
ESK sindikatuak ohartarazi duenez, Osakidetzaren arazoak "ez dira konpontzen autokontzertazioaren prezioaren igoerarekin"; aitzitik, "arazoak denboran iraunarazten ditu, berehalako irtenbideak eman gabe, hori baita behar dena".
CCOOk kritikatu du Osakidetzako zuzendaritza berriak "mahai sektorialari bizkarra emanda lan baldintzak berriro dekretatu izana", eta ohartarazi du "aurreko taldeen akats berberak" errepikatzen ari dela.