Oliba-olioak ez du BEZik izango uztailetik aurrera

Espainiako Gobernuak iragarri duenez, uztailaren 1etik aurrera, oliba-olioari ez zaio aplikatuko Balio Erantsiaren gaineko Zerga (BEZ). Ogasun Ministerioak datorren astearteko Ministroen Kontseilura eramango du neurria.

Oliba-olioaren BEZa % 5ekoa baino ez da 2023ko beherapenaz geroztik. Orain, % 0ko BEZa duten premia handitzat hartutako beste produktuei gehituko zaie (ogia, irinak, esnea, gaztak, arrautzak, frutak eta barazkiak).

Oliba-olioa da prezioa gehien igo duen elikagaia. Lau urte baino gutxiagoan, 2021eko urtarriletik, hirukoiztu egin da salneurria (% 198,5eko igoera). Maiatzean, duela urtebete baino % 62,8 garestiago zegoen.

Ministerioak jakitera eman duenez, neurri honen helburua "oliba-olioaren kontsumoa babestea eta sustatzea da, produktu osasungarria baita eta lehortearen eta beste arrazoien ondorioz garestitu baita".

Neurri hori Pedro Sanchezen inbestidura babesteko baldintza bezala eskatu zuen Juntsek. PSOEk eta Sumarrek krisiaren aurkako dekretutik eratorritako lege-proiektuaren zuzenketan erregistratu zuten.

Gainera, Sanchezek ekainaren 12an iragarri zuen oinarrizko elikagaien BEZaren beherapena luzatu egingo zela. Oliba-olioari eragiten dion neurri berri hori lege-dekretu berean jaso liteke. Kongresuan ekainaren 30a baino lehen onartu behar da, egun horretan amaitzen baita luzapena.

"Elikagaien prezioen igoerak altua izaten jarraitzen du eta, beraz, ahalegin hori egin behar dugu; diru-kutxa publikoentzat ahalegin handia da", esan zuen bere garaian Gobernuko presidenteak.

Beherapen hori luzatzeko erabakia ez dator bat Europar Batasunari apirilaren 30ean 2024rako eta 2025erako aurreikuspen makroekonomiko eta fiskalak eguneratzeko dokumentuan helarazitakoarekin. Dokumentu horretan, Gobernuak aurreikusten zuen ekainaren 30ean jaitsiera bukatuko zela.