Ekonomia -
LAN GATAZKA
Jaurlaritzak % 20 igo ditu Bilbobuseko gutxieneko zerbitzuak Bilboko auzo garaienetan zerbitzua ahalbidetzeko
Bilboko alkateak uste du erabaki hori "albiste ona" dela "zentzurik gabeko greba baten aurrean". Bilbobuseko langileek greba mugagabea hasi zuten apirilaren 9an, enpresarekin hitzartutako soldata-igoerak eskatzeko.
EITB MEDIA
Eusko Jaurlaritzako Lan eta Enplegu sailak Bilbobuseko gutxineko zerbitzuak % 20 handitu ditu bide alternatiborik ez duten lineetan edo osasun-zentroetara doazenetan. Exekutiboak narbarmendu duenez, neurri hau hartzeko lantokietako eta ikastetxeetako sarrera- eta irteera-ordutegiak kontuan hartu dira. Gogoratu behar da Bilboko autobus zerbitzuko langileek greba mugagabea hasi zutela joan den apirilaren 9an, enpresarekin hitzartutako soldaten igoera eskatzeko.
Sailaren ebazpena Biobidek, zerbitzua ematen duen enpresak, Bilbobusen gutxieneko zerbitzuak zabaltzeko eskatu ondoren iritsi da. Lan eta Enplegu Sailak adierazi du "osasuna babesteko behar den laguntza jasotzeko edo lantokietara joateko langileek dituzten eskubideak" ez direla babesik gabe utzi behar. Hala, esan du erdigunetik urrun dauden auzoetan gutxieneko zerbitzuak murrizteak "desberdintasun egoerak" sortzen zituelaherritarren artean.
Era berean, aginduaren arabera, greba luzatzea hitzarmenaren negoziazioek huts egitearen ondorio da, eta aurrekaririk gabeko greba dela.
Aburto, pozik "greba zentzugabe honen" aurrean
Gutxieneko zerbitzuen gorakadaren aurrean Juan Mari Aburto Bilboko alkateak adierazi du "albiste ona" dela, batez ere Bilboko auzo garaietako bizilagunentzat, "garraio alternatiborik ez dutelako eta batere zentzurik ez duen greba baten kaltea jasaten ari zirelako".
Alkateak esan du udalaren konpromisoa "beti" izan dela gutxieneko zerbitzuengatik borrokatzea eta, beraz, "oso pozik" daudela Eusko Jaurlaritzak "hala ulertu duelako".
Amaitzeko, eta egoera konpontzeko asmoz Aburtok adierazi du enpresaren eta sindikatuen arteko "negoziazioei berriro ekiteko unea" dela.