Bizkaiko ekonomia % 2 inguru haziko dela aurreikusi du Bilboko Merkataritza Ganberak

Bilboko Merkataritza Ganberak gaur zabaldutako aurreikuspenen arabera, Bizkaiko ekonomia % 1,4 eta % 1,5 artean haziko da aurten, eta datorren urterako hazkunde "oso neurritsua" iragarri du, % 1,9 eta % 2 artean.

Jose Ignacio Zudaire eta Mikel Arieta-araunabeña Bilboko Merkataritza Ganberako presidenteak eta idazkari nagusiak Bizkaiko ekonomiaren inguruko analisia aurkeztu dute, gaur goizean, Bilbon, egin duten prentsaurrekoan.

Aurkezpenean Zudairek azpimarratu duenez, aurtengo urtea definitzen duen hitza "dezelerazioa" da eta datorren urterako hazkunde "oso neurritsua" iragarri du, "agertoki zail batean".

Bizkaiko enpresa gehienek (% 79) uste dute datorren urtean egoera "egonkorra" edo "positiboagoa" izango dela, eta "nahikoa baikor" mintzatu dira "hazkunde txikiak" aurreikusten baitituzte. Eraikuntza eta merkataritza sektoreak ditu aurreikuspen ezkorrenak, eta industriak, berriz, onenak. Enpleguari dagokionez, lau enpresatik hiruk langileak mantentzea espero dute eta, aitzitik, % 8k langileak murriztea.