35 urteko emakume bat hil da Adunan, traktorearekin istripua izanda

35 urteko emakume bat hil da gaur arratsaldean Adunan (Gipuzkoa), gidatzen ari zen traktorearekin istripua izanda. Sagar-bilketan ari zen, Goiburu auzoko sagasti batean.

Eusko Jaurlaritzako Segurtasun Sailak jakinarazi duenez, 14:40 inguruan jaso dute SOS Deiak larrialdietarako zerbitzuan istripuaren abisua.

Suhiltzaileak, ertzainak eta osasun-langileak bertaratu dira, eta ordurako emakumea hilda zegoen. Lehen ikerketen arabera, traktorea atzeraka abiatu da eta zuhaitz baten kontra jo du. Harrapatuta geratu da langilea.

Ertzaintzak ikerketa zabaldu du, ezbeharra nola gertatu den argitzeko. Osalaneko teknikariak ere istripuaren tokian izan dira.