Ekonomia -
Lan-gatazka
ELAk greba-eguna deitu du gaurko ehungintza kate handietan
Gaur, astelehena, abiatuko dute arropa eta zapata denda handien Estatuko lehen lan-hitzarmenaren negoziazioa eta, ELAk ohartarazi duenez, ekimen horrek "lan-eskubideen galera ekarriko die Euskadiko eta Nafarroako dendetako langileei".
AGENTZIAK | EITB MEDIA
Greba-eguna deitu du gaurko ELA sindikatuak ehungintza kate handien dendetan, enpresa horiek sustatzen ari diren Estatu mailako lan-hitzarmenaren aurka eta probintzia-hitzarmenen negoziazioaren alde. Gainera, CIG Galiziako sindikatuak, OSTA Aragoikoak eta ELAk berak ere elkarretaratzea egingo dute Madrilen.
Ohar baten bidez ELAk azaldu duenez, ehungintza kate handiek gaur, astelehena, abiatuko dute Estatuko lehen lan-hitzarmenaren negoziazioa. "Ekimen horren atzean Inditex dago, H&M, Primark eta Mango bezalako arropa-kate handiekin batera (ARTE patronala osatzen dute), eta akordio horrekin lan-baldintzak Estatu osoan parekatzen saiatuko dira", adierazi du ELAk.
"Estatu mailako lan-hitzarmen horren helburua izango da ehungintza kate handi horietako langileak probintzia-hitzarmenetatik kanpo uztea", kritikatu du. "Horrek lan-eskubideen galera ekarriko die Euskadiko eta Nafarroako arropa eta zapata dendetako langileei, probintzia-hitzarmenek lan-baldintza onuragarriagoak bermatzen dituztelako, lanegun murritzagoak eta soldata handiagoak, besteak beste", ohartarazi du.
