Ekonomia -
EUROPAKO FUNTSAK
Euskadik 1.657 milioi jaso ditu orain arte Europako berreskuratze-funtsetatik
Jaurlaritzak Eskualdeetako Proiektu Estrategikoak "laster" aktibatzea espero duela esan du. Halaber, dirulaguntzen prozeduren klausulak "birpentsatu" behar direla adierazi du, "alferrikako baldintzak saihesteko, epeak ahalik eta gehien malgutzeko eta izapideak ahalik eta gehien murrizteko".
AGENTZIAK | EITB MEDIA
Orain arte, Euskadik 1.657 milioi euro jaso ditu Europako funtsetatik; horietatik 1.048 (% 63,2) Eusko Jaurlaritzak kudeatzen ditu, eta gainerako 609 (% 36,8) Estatuko Administrazioak zuzenean.
Eusko Jaurlaritzako Ekonomia eta Ogasun sailburu Pedro Azpiazuk funts horiei buruzko datuak eman ditu ezagutzera gaur, astelehena, hiru hilean behin Legebiltzarrean egindako agerraldian, prozesu horren nondik norakoei buruzko informazioa emateko.
Azpiazuk bereziki aipatu du Eskualdeetako Proiektu Estrategikoak "azkar aktibatu" behar direla, "pragmatismo" kontua dela eta.
Horren harira, adierazi du Eusko Jaurlaritza "behin eta berriz" jasotzen ari dela enpresen eta gizarte-eragileen "mezuak", funtsak eskuratzeko administrazio-prozesuen "burokrazia bizkortzea" eskatzen dutenak.
Halaber, adierazi du dirulaguntzen prozeduretako klausulak "birpentsatu" behar direla, "alferrikako baldintzak saihesteko, epeak ahalik eta gehien malgutzeko eta izapideak ahalik eta gehien murrizteko".
Bestalde, sailburuak azpimarratu duenez, kudeaketa zuzeneko funtsak gorenera iristen ari direla dirudi, eta hazkundeak dagoeneko "marjinalak" dira.