Hil egin da joan den ostiralean Burlatan lan-istripua izan zuen langilea

Hil egin da maiatzaren 12an Burlatako Iturrondo industrialdean lan-istripua izan zuen 22 urteko langilea. Behargin gaztea larri zaurituta eraman zuten Nafarroako Unibertsitate Ospitalera, eta ostegun honetan hil da, CCOO sindikatuak ohar bidez jakitera eman duenez.

SOS Nafarroa 112 Larrialdi-zerbitzuak joan den ostiralean, eguerdian, jaso zuen istripuaren berri, eta bizi euskarri aurreratuko anbulantzia bat bidali zuen lekura, besteak beste. Beharginak, traumatismo torazikoa jasan zuen, makina jasotzaile batek harrapatu baitzuen.

Osasun zerbitzuek bertan artatu ondoren, Nafarroako Unibertsitate Ospitalera eraman zuten, oso larri.

Sindikatuak irmo salatu du lan-istripua, eta neurri gehiago eskatu ditu "langile bakar batek ere ez dezan bere bizitza arriskuan jarri behar bere lanaldian". 

CCOOren arabera, "arreta guztia jarri behar da Nafarroan suertatzen ari diren lan-istripuak murrizteko ahaleginetan. Foru Erkidegoa da langileen istripu-ratiorik kezkagarriena duen lurraldeetako bat, eta, beraz, beharrezkoa da errealitate hori lehenbailehen bukatzeko neurriak hartzea".

CCOOren arabera, "errotik egin beharreko aldaketak sustatu behar dituzte erakundeek enpresetan". Testuinguru horretan, sindikatuak prebentzioaren arloan egiten ari diren lana aldarrikatu du.