KPIa % 4,1eraino igo da apirilean eta azpiko inflazioa % 6,6ra jaitsi da

Kontsumoko Prezioen Indizearen urte arteko tasa % 4,1eraino igo da apirilean, iazko hilabete bereko datuekin alderatuta, Espainiako Estatistika Institutuak gaur aurreratutako datuen arabera. Martxoan, urte arteko tasa % 3,3koa izan zen, zortzi hamarren txikiagoa.

Urte arteko inflazioak beheranzko joera eten, eta gora egin du berriro, batez ere, argindarraren prezioa iazko apirilean baino gutxiago jaitsi delako eta erregaien prezioak, aldiz, iaz ez bezala, gora egin duelako.

Aitzitik, elikagaiak eta alkoholik gabeko edariak iazko apirilean baino gutxiago garestitu dira.

Urte arteko datuak nabarmen behera egin badu ere, prezioek gora egiten jarraitzen dute oraindik.

Azken hilabeteko bilakaera kontuan hartuta, berriz, prezioak sei hamarren garestitu dira martxotik apirilera.

Azpiko inflazioa, energia eta elikagai freskoak kontuan hartzen ez dituena, % 6,6raino jaitsi da apirilean, aurreko urteko hilabete bereko datuekin alderatuta. Martxotik apirilera, berriz, puntu bat igo da.

Espainiako Estatistika Institutu Nazionalaren arabera, elikagaiak % 16,5 garestitu dira iazko martxotik aurtengo martxora, otsailean baino hamarren bat gutxiago. % 16,6koa izan zen tasa orduan, 1994tik izandako altuena. Gainera, orain elikagaiak gehiago garestitu daitezke lehorteagatik. EITBk Garlan Arabako kooperatibako teknikari eta nekazariekin eta Arkaitz Urdapilleta ekonomilariarekin aztertu du egoera.

Apirileko datu aurreratua datorren hilaren erdialdean baieztatuko du Espainiako Estatistika Institutuak.