Ekonomia -
LAN GATAZKA
Greba eguna deitu dute astelehenerako Bizkaibusen, Durangaldeko zerbitzuan salbu
24 orduko lanuzteaz gain, Busturialdea Lea-Artibai, Ezkerraldea-Meatzaldea, Enkarterri eta Txorierri-Mungialdea konpainietako langileek manifestazioa egingo dute Bilbon goizeko lehen orduan.
EITB MEDIA
Bizkaibusen zerbitzua eskaintzen duten lau enpresatako langileak (Busturialdea Lea-Artibai, Ezkerraldea-Meatzaldea, Enkarterri eta Txorierri-Mungialdea) greba egitera deituta daude datorren astelehenean, lan hitzarmena berritzea eskatzeko. Salbuespen bakarra Durangaldea izango da; izan ere, Avanzada Durangaldeko langileek KPIaren araberako soldata igoerak adostu dituzte, eta zerbitzua normaltasunez eskainiko dute.
UGT sindikatuak jakinarazi duenez, lau enpresa horietan "bidezko hitzarmen baten eta KPIaren araberako soldata igoeraren alde" mobilizatuko dira, "zerbitzuaren enpresetako langileen artean diskriminaziorik egon ez dadin".
Langileen ordezkariek negoziazioan bitartekari izateko eskatu diote Bizkaiko Foru Aldundiari, Bizkaibuseko zerbitzuaren arduraduna den aldetik.
Gainera, 24 orduko grebaz gain, sindikatuek manifestazioak deitu dituzte goizeko lehen orduan Bilbon. Vectalia Txorierri enpresako langileak San Pedro plazatik abiatuko dira, Ezkerraldea-Meatzaldekoak EITBtik, eta Busturialdea Lea-Artibaikoak Juan Garai kaletik. Vectalia Enkarterriko langileak beste manifestazioetara batuko dira, eta guztiek bat egingo dute Bizkaiko Foru Aldundiaren egoitzaren aurrean, 10:30 aldera.
"Akordiorik gabe jarraitzen dugu", salatu du Oscar Lopez Bizkaibuseko Busturia Lea-Artibai Buseko langile batzordeko presidenteak, eta "gatazka luzea" iragarri du.