Hezkuntzako grebak % 60ko jarraipena izan du sindikatuen hitzetan, eta % 32,7koa, Jaurlaritzaren arabera

ELA, LAB eta Steilas sindikatuek EAEko hezkuntza publikoan deitutako bigarren greba egunarekin bat egiteko deia egin dute gaur, Hezkuntza Legearen aurreproiektuaren zirriborroa errefusatzeko. Greba jarraipen "zabala" izaten ari da sindikatu deitzaileen arabera. Eusko Jaurlaritzak, ordea, % 32,7ra mugatu du parte hartzea.

Miren Zubizarreta ELAko Hezkuntza arduradunak "positibotzat" jo ditu azaroaren 30eko eta gaurko greba egunak, "jarraipen zabala" izateaz gain, hezkuntza publiko, propio eta euskaldunaren aldeko eskaerak kalera atera direlako.

Zubizarretak Eusko Jaurlaritzari eta alderdiei eskatu die testuak langileen eskaerak jasotzea hezkuntza sistema publiko, propio eta euskalduna lortzeko, Eusko Jaurlaritza "entzungor" egiten ari delako. Ildo horretan, azpimarratu du ez dela greba "prebentiboa", Hezkuntza Lege desberdin bat aldarrikatu nahi duen greba baizik.

Irati Tobar LABeko irakaskuntzako arduradunaren esanetan, gaur berriro kalera atera dira esateko ez daudela ados Hezkuntza Legearen aurreproiektuarekin eta ezberdina izatea nahi dutelako.

Hezkuntza sare "publiko, euskaldun eta propioa" lortzeko bidean langileak aintzat hartu behar direla nabarmendu du. 

Nagore Iturrioz Steilas sindikatuko bozeramaileak Eusko Jaurlaritzari eta alderdiei eskatu die beren eskaerak entzun ditzatela eta mahai gainean jarri duten aurreproiektuaren norabidea aldatu dezatela, sistema publiko-pribatua betikotzen duela iritzita.

Iturriozen hitzetan, Eusko Jaurlaritza ez da ausartzen euskal eskola publikoa indartzen laguntzeko neurri zehatzak hartzen, baina sare publiko indartsua lortu borrokan jarraituko dutela esan du.

UGT eta CCOO sindikatuek ez dute greba hori babesten, nahiz eta Eusko Jaurlaritzaren testuarekin kritikoa izan. Azaroaren 30ean, arrazoi beragatik lehen lanuztea egin zuten hezkuntzako hainbat langilek.

Bigarren greba egun horren harira, ELA, LAB eta Steilas sindikatuek manifestazioa egin dute goizean Gasteizen, Bilbo plazatik abiatuta.

Arratsaldeko 18:00etan, elkarretaratzeak egingo dituzte hiru hiriburuetan. Bilbon, Jaurlaritzak duen egoitzaren aurrean (Kale Nagusia 85); Donostian, Alderdi Ederren; eta Gasteizen, Legebiltzarraren aurrean.

Sindikatuek EH Bildu eta Elkarrekin Podemos presionatu nahi dituzte, Jaurlaritzaren esanetan

Bingen Zupiria Eusko Jaurlaritzako bozeramaileak "kezka" agertu zuen atzo bigarren greba horrengatik, eta sindikatu deitzaileei EH Bildu eta Elkarrekin Podemos-IU "presionatzen" saiatzea egotzi die. Horren ustez, bi indarrek EAJrekin eta PSE-EErekin apirilean adostutako itunean jasotakoa "aldarazi" nahi dituzte ELAk, LABek eta Steilasek.

Greba deialdiaren aurrean, Jaurlaritzak honako gutxieneko zerbitzuak ezarri zituen: zuzendaritza taldeko kide bat eta mendekoen kidegoko langile bat; koordinatzaile bat eta etapa bakoitzeko irakasle bana, eta horiei beste irakasle bat batu beharko zaie etapa bakoitzean matrikulatutako 100 ikasleko (Haur Hezkuntzako 1. eta 2. zikloko, Haurreskolak barne, eta Lehen Hezkuntzako etapetan).