Ekonomia -
Empresak
Siemens Gamesa Espainiako Estatuko zortzi lantegi salgai jartzea aztertzen ari da, tartean EAEko bi
Negoziazioaren iturriek jakinarazi dutenez, multinazionalak multzoan saldu nahi ditu enpresok, baina Asteasukoa eta Mungiakoa erosteko EAEn eskaintzarik dagoen aintzat hartuko ei du. Hain justu, hori da Jaurlaritzak egin duen eskea. "Egon badaude", esan du Tapiak.
EITB MEdia
Siemens Gamesak EAEn dituen bi lantegi, Asteasukoa (Gipuzkoa) eta Mungiakoa (Bizkaia), saltzea aztertzen ari da multinazionala, Espainiako Estatuan dituen beste seirekin batera. Aerosorgailuentzako elementuak egiten dituzten filialak dira denak ere.
Negoziazioaren iturriek EITB Mediari zehaztu diotenez, hastapenetan legoke operazioa, eta datozen asteetan abia badaiteke ere, hilabeteak beharko dira burutzeko, 2023 erdialdera arte, gutxi gorabehera.
Konpainiak ez du horren inguruko xehetasunik eman nahi izan, baina, iturrion arabera, zortzi lantegiak batera saldu nahiko lituzke. Hori bai, EAEko fabrikak erosteko eskaintzarik balego kontuan hartuko omen luke.
Asteasuko lantegian gehiengoa duen LAB sindikatuak gogorarazi duenez, "enplegua bera mantentzeko eta jardunari eusteko eta hura handitzeko" akordioa erdietsi zuen zuzendaritzarekin hilabete hasieran. Mungiako lantegiko ordezkari sindikalek, bestalde, bilera eskatu diote enpresari antzeko itun bat ixteko asmoz.
EAEko enpresen eskaintzak kontuan hartzeko deia
Arantxa Tapia Eusko Jaurlaritzako Ekonomiaren Garapen, Jasangarritasun, eta Ingurumen sailburuak multinazionalari eskatu dio, salmenta gauzatu baino lehen, entzun ditzala EAEko enpresek egin ditzaketen eskaintzak.
Gasteizen egindako adierazpenetan, Tapiak argitu du "jakinaren gainean" daudela, eta badakitela enpresaren egoera "zaila dela orokorrean".
Azaldu duenez, Jaurlaritzak EAEko enpresen eskaintzak aztertzeko eskatu dio multinazionalari, "egon badaude", erantsi du.
Tapiaren esanetan, "salmenta ahalik eta modu onenean egitea nahiko genuke. Hori da gure helburua, eta nire ustez, baita enpresarena ere".
