Gasteizko Michelinek ekoizpena partzialki etengo du irailean eta urrian

Gasteizko Michelinek pneumatikoen ekoizpena partzialki etengo du irailean eta urrian, sindikatuetako ordezkariek Radio Euskadiri adierazi diotenez. Geldialdia sei lanegunetan egingo dute, hiru asteburuz, zuzendaritzak enpresa batzordeari jakitera eman dionez.

Enpresaren arabera, gurpilen eskari falta da etenaldiaren arrazoi nagusia. Gainera, autoen pneumatikoaren sektorean ez ezik, obra zibileko gurpilen produkzioan ere geldialdiak egongo direla aurreratu du Michelinek.

Etenak 1.100 langileri eragingo die, ia plantilla osoaren herenari. Beharginek lan orduen poltsa bidez asumituko dute geldialdia.

Alberto Martin CCOOko ordezkariak azaldu duenez, sindikatuek mozketa gehiago espero dituzte datozen hilabeteetan.