Ekonomia -
ABIADURA HANDIA
Espainiako Gobernuak AHTaren plataforma eta Gasteizko integrazio-zatia lotzen dituzten obrak esleitu ditu
Zatia Iruña Oka eta Gasteiz udalerrietatik igarotzen da, 3,6 kilometro inguruko luzerarekin. Kontratua 27,5 milioi euroren truke esleitu dute, eta urtebeteko exekuzio-epea du.
AGENTZIAK | EITB MEDIA
Espainiako Gobernuak esleitu egin ditu Abiadura Handiko Trenaren plataforma eta Gasteizko integrazio-tartea lotzen dituzten obrak. Kontratua Construcciones Sanchez Dominguez Sando enpresari esleitu zaio 27,5 milioi euroren truke, eta urtebeteko egikaritze-epea du.
Eraiki beharreko plataformaren tartea Iruña Oka eta Gasteiz udalerrietatik igarotzen da, 3,6 kilometro inguruko luzerarekin, eta Denis Itxaso Espainiako Gobernuak Euskal Autonomia Erkidegoan duen ordezkariak azpimarratu duenez, esleipen horrek "agerian uzten du Espainiako Gobernuak Euskadik trenbide-abiadura handiko sarearekin duen lotura bizkortzeko duen konpromisoa".
Esleipena Adif Abiadura Handiko Enpresaren Administrazio Kontseiluan egin da. Kontratua Construcciones Sanchez Dominguez Sando enpresari esleitu diote 27.524.691euroren truke, 12 hilabeteko exekuzio-epea du, eta lanak lur-berdinketan eta lur-garbiketan egingo dira, Ministerioak jakinarazi duenez.
Hasiera Villodas kontzejuaren ekialdean dago, Iruña Oka udalerrian, Zadorra ibaiaren ezkerreko ertzean. Linea berriaren trazadura, hasiera batean, Madril-Hendaia egungo sare konbentzionaletik ekialdera doa, egungo azpiegituraren mendebaldera daraman pergolaren gainetik zeharkatzeko, banatzeko eta Jundizko terminal intermodal berria garatzeko aukera ematen duen bien arteko espazioa sortzeko.
Proiektu honek Burgos-Gasteiz abiadura handiko linearen trazadura eta trenbidea, euskal hiriburutik igarotzean, Madril-Valladolid-Burgos-Gasteiz/Gasteiz-Bilbo-Donostia - Frantziako muga abiadura handiko linea berriaren barruan integratzea ahalbidetzen du.