Euskadiko esportazioak % 23 hazi dira 2021ean eta pandemia aurreko zifrak gainditu dituzte

Euskal Autonomia Erkidegoko (EAE) esportazioak % 23 hazi dira 2021ean, aurreko urtean baino 4.800,9 milioi gehiago, eta 25.665 milioi eurora iritsi dira, Eustat Euskal Estatistika Erakundeak landutako datuen arabera.

Urtean zehar, 2019. urteko metatua gainditu da, eta orduan baino 179,6 milioi gehiago lortu dira. EAEko kanpo-merkataritzak, 2021ean, 4.605,5 milioi euroko saldo positiboa izan du eta % 121,9ko estaldura-tasa.

Lurraldez lurralde aztertuta, Bizkaia esportazio-jardueragatik nabarmendu zen aldi horretan; izan ere, urte arteko % 31,2ko hazkundearekin, ondasunen salmenten buru da, 10.205 milioi eurora iritsiz. Araban, hazkundea % 19,4koa izan zen (7.340,5 milioi) eta Gipuzkoan % 17,1ekoa (8.120 milioi).

Inportazioei dagokienez, Bizkaiak % 41,9ko igoera izan du, eta 11.879,6 milioi euroan inportatu ditu ondasunak; ondoren, Gipuzkoak, 4.650,3 milioi euroan eta % 29,3ko igoera, eta, azkenik, Arabak, % 21,3 eta 4.529,9 milioiko ekarpenarekin Euskal AEko zenbateko osoan.

Produktuak

Produktu mota kontuan hartuta, Produktu ez-energetikoek (urte arteko 4.387,1 milioiko hazkuntza, % 22,0) lagundu diote gehien esportazioen hazkuntzari; Produktu energetikoek ere aurreko urtean baino 413,8 milioi gehiago izan dute (% 43,5).

Bestalde, Produktu energetikoen inportazioek % 57,6 egin dute gora, eta Produktu ez-energetikoenek, % 28,8.

Aldi horretan, EAEko esportazioen xede honako herrialde hauek izan dira: Frantzia da zerrendako lehena, esportatutako kopuru osoaren % 16,1 hartzen baitu (4.120 milioi euro), eta Alemania gainditu du, zeinak, azkenean, bigarren lekua betetzen baitu (% 15,9 eta 4.092 milioi euro).

Bi herrialde horien ondoren, Erresuma Batua (1.695 milioi eta guztizkoaren % 6,6), Estatu Batuak (1.592 milioi eta % 6,2) eta Belgika (1.362 milioi eta % 5,3) daude. Bost herrialde horiek Euskal AEko esportazioen erdia hartzen dute (12.861 milioi, % 50,1).

Jarduera-adar garrantzitsuenen artean, esportazio-bolumenari dagokionez, 2021ean, "Siderurgia" nabarmentzen da, % 50,2ko gehikuntza izan baitu aurreko urteko aldi berarekin alderatuta (955,6 milioi euro gehiago; 2.858,8 milioira iritsi da). Nabarmen hazi da, era berean, honako hauen esportazioa: "Kokeria eta petrolio-fintzea" (% 44,9), "Burdinazkoak ez diren metalak" (% 41,8), "Material eta ekipo elektrikoak" (% 21,7), "Kautxuzko produktuak" (% 18,3) eta, bereziki, "Ontzigintza" (% 239,5), besteak beste.

"Motordun ibilgailuen fabrikazioarekin" zerikusia duten produktuen adarrak (5.543,7 milioi eta guztizkoaren % 21,6), 2021. urteko hamabigarren hila amaitzean, % 15,6ko hazkuntza metatua erregistratu du, aurreko urteko aldi berean baino 746,7 milioi gehiago, eta Euskal AEko esportazio-rankingean duen nagusitasuna finkatu du.