Lanbide pertsonei eta enpresei hurbiltzeko LanApp aplikazioa jarri dute abian

Idoia Mendia Lan eta Enplegu sailburu eta lehendakariordeak LanApp-a aurkeztu du, Lanbidek eskaintzen dituen zerbitzu guztietara edozein gailu mugikorretatik sartzeko aukera emango zuen proiektu aitzindaria.

Sailburuak ostegun honetan aurreratu duenez, "Lanbide pertsonei eta enpresei hurbiltzeko" balioko du; izan ere, ekimen honen bidez, edonor sartu ahal izango da, gailu mugikor batetik, Euskal Enplegu Zerbitzuak sareko 42 bulego presentzialetan orain eskaintzen dituen zerbitzu guztietara.

Lanbidek beste urrats bat eman du. Sareko 43 zenbakidun bulegoa izango da eta urtarriletik aurrera egongo da martxan. Euskal administrazioan eta Espainiar Estatuan proiektu aitzindaria da; izan ere, Kataluniak eta Aragoik soilik dituzte antzeko harreman-ereduak.

"Ez gara harreman telematikoaz ari, baizik eta edozein bulegotan ematen den arreta integralaz, baina zerbitzu pertsonalizatu batekin eta edozein lekutatik eskura daitekeena", azpimarratu du Lehendakariordeak. Dena dela, presentzialtasuna sareko beste 42 bulegoetan berdin-berdin mantenduko dela azaldu du.

Mendiak zehaztu duenez, "gure telefonotik Lanbidek eskaintzen dizkigun zerbitzu guztiak eskuratu ahal izatea" ahalbidetuko du: laguntza bat, lan-proposamen bat, ibilbide profesional bat edo prestakuntza-baliabide bat", gaineratu du.

Zerbitzu horrek 500.000 euroko inbertsioa izan du aurten abian jartzeko, eta 2022an beste milioi erdi bat euro bideratuko dira zerbitzuaren zabalpen progresiborako.