AHTaren Bilboko eta Gasteizko sarrerak definitzeko bilera egun garrantzitsua izan daiteke gaurkoa

Gaur, osteguna, Abiadura Handiko Trenaren (AHT) Gasteizko eta Bilboko sarrerak eta geltokiak definitzeko egun mugarria izan daiteke. Batetik, Iñaki Arriola Lurralde Plangintza, Etxebizitza eta Garraio sailburua Raquel Sanchez Garraio, Mugikortasun eta Hiri Agendako Espainiako Gobernuko ministroarekin elkartuko da 10:00etan Lakuan. Juan Mari Aburto, bere aldetik, Madrilera joan da Isabel Pardo Garraio, Mugikortasun eta Hiri Agendako Estatu idazkariarekin elkartzeko.

Aipaturiko bilera horietan, AHTaren etorkizuneko Bilboko eta Gasteizko geltokiez eta hiriburuetarako sarrerez hitz egingo dute.

Eusko Jaurlaritzako iturriek uste dute Lakuako hitzordua garrantzitsua izan daitekeela AHTaren Bilboko eta Gasteizko geltokiak lur azpitik egingo direla bermatzeko eta bi hiriburuetarako sarreren lanak Jaurlaritzak bere gain hartuko dituela zehazteko. Espainiako Gobernuak begi onez ikusten du lanak azkarrago egiteko ardura Jaurlaritzak hartzea. Hala ere, momentuz ez dago inolako akordiorik.

Iñaki Arriola sailburuak Eusko Legebiltzarrean aurreratu zuenez, Eusko Jaurlaritzak egingo ditu Zaratamoko tunela eta Arkautiko korapiloaren zati bat. Gipuzkoako zatiarekin egin bezala, egindako lanen kostua Kupotik deskontatuko litzateke. Hala ere, ikusteko dago horretarako eperik jartzen duten edo konpromisorik hartzen duten. 

Adifeko presidentea eta Denis Itxaso Espainiako Gobernuak EAEn duen ordezkaria ere egongo dira Lakuako batzarrean.

Bestalde, AHTaren Bilboko eta Gasteizko geltokien inguruan ere zalantzak daude. Bilboko sarrera eta geltokiaren etorkizuna argitzeko, Juan Mari Aburto Bilboko alkatea Garraioko Estatu idazkariarekin elkartuko da. Aburtok aurreko astean esan zuenez, Udalak ez du trenbidea lurperatzea eta lur azpiko geltokia aurreikusten ez duen proiekturik onartuko.