Ekonomia -
PREZIOAK
Energia Klusterrak adostutako neurriak eskatu ditu faktura elektrikoa murrizteko
Klusterraren arabera, Espainiako Gobernuaren neurriek "bidegabeki zigortzen" du energiaren sektorea, eta arriskuan jartzen dituzte berriztagarrietan, elektrifikazioan eta eraginkortasunean egindako inbertsioak.
AGENTZIAK | EITB MEDIA
Euskadiko Energiaren Kluster Elkarteak (EKE) kontsumitzaileen elektrizitate-fakturaren igoera "arintzeko" adostutako neurriak eskatu dizkio Espainiako Gobernuari, energiaren eta industriaren sektoreetan eta trantsizio energetikoaren prozesuan "eragin negatiborik" izan gabe.
Ohar batean, Klusterra "kezkatuta" agertu da Pedro Sanchezen Gobernuak argindarraren igoera arintzeko onartutako neurriengatik, lege dekretu batean jasota baitaude, eta neurri horien helburua da, besteak beste, nuklearrak, hidroelektrikoak eta primarik gabeko berriztagarriak behartzea 2022ko martxora arte sortzen dituzten mozkin "gehigarriak" itzultzera.
Prezio altuen arrazoia gas naturalaren prezioen igoerari "nagusiki" erantzuten diola nabarmendu ondoren, EKEk dio gobernuaren neurriek "bidegabeki zigortzen" dutela energiaren sektorea, eta epe luzerako kontratuak dituzten kontsumitzaileei "kalte" egiten dietela.
Halaber, uste du energia-enpresetan izandako galera ekonomikoek "arriskuan" jartzen dituztela energia berriztagarrietan, elektrifikazioan eta eraginkortasunean egindako inbertsioak, "beharrezkoak baitira Energia eta Klimaren Plan Nazionalean ezarritako deskarbonizazio-helburuak lortzeko".
Inbertsio horietarako aurreikusitako epeekiko atzerapenak, "eragin larria izango du, halaber, energia-sektoreko balio-kate osorako onurak lortzeko, jarduera ekonomikoari eta kalitatezko enpleguari dagokienez", EKEren arabera.
