Pentsio publiko "duinak" defendatuko dituzte astearte honetan, Bruselan

Andaluzia, Gaztela eta Leon, Nafarroa eta Euskadiko pentsiodunak arratsaldean abiatuko dira Bruselara bi autobusetan. Astearte honetan Europako Parlamentura joango dira, pentsio publiko "duinak" defendatzeko.

Astelehenetako elkarretaratzean Bruselako bidaiaren berri eman du Euskal Herriko Pentsiodunen Mugimenduak, Bilboko udaletxearen aurrean. Gaur Estatuko Pentsiodunen Koordinakundeko (COESPE) lagunak ere bertan izan dira.

"Europako Parlamentuak funtsen banaketa pentsio publikoak murriztera eta pribatuak bultzatzera baldintzatzen duela ikusita kezkaturik gaude", laburbildu du Jon Fano mugimenduko bozeramaileak.

Bruselan Europako talde parlamentario ezberdinekin bilduko dira. Era berean, Enplegu eta Gizarte Politikako Batzordearen ordezkaritza batekin batzartuko dira. Aldez aurretik, proposamenak bidali dizkiete gutun batean.

Parlamentuko talde politikoei "estrategien erabateko aldaketa" eskatu diete gutunean, "pentsio sistema publikoen prestazioak murrizten ari direlako, finantza sektorearen kontrolpean dauden pentsio plan pribatuen mesedetan".

Gainera, Europako Batzordearen Liburu Berdea banaketa sistema publikoen aurkako mehatxu bat dela ziurtatu dute. Bestalde, Europako Batzordearen jarrera salatu dute, "finantza lobbyen ordezkari gisa ari delako".

Mugimenduaren aldarrikapenak ezagunak dira dagoeneko: pentsio publikoak blindatzea, herrialde bakoitzeko batez besteko soldataren % 60a bermatzea gutxieneko pentsioetan zein soldatetan, eta BEZaren arabera pentsioak automatikoki egokitzea.

Astearteko mobilizazioaz gain, ostiralean pentsiodunek manifestazioak egingo dituzte Hego Euskal Herriko lau hiriburuetan, adinekoen nazioarteko eguna baita.