Ekonomia -
USTELKERIA
Auzitegi Nazionalak Iberdrola Renovables inputatu du Villarejo auzian, eroskeria egotzita
Pieza berean inputatuta daude Repsol eta Caixabank ere. Epailearen ustez, komisarioari, ustez, legez kanpo egindako enkarguak konpainien izenean eta haien mesedetan egin ziren. Gainera, akats larrien zantzuak ikusi ditu kontratazio eginbideetan.
Olatz Prat | eitb media
Manuel Garcia-Castellon Auzitegi Nazionaleko epaileak Iberdrola Renovables inputatu du, pertsona juridiko gisa, Tandem kasuaren 21. pieza bananduaren barruan, orain erretiratua den Jose Manuel Villarejo komisarioa ustez kontratatzeagatik, hura oraindik Polizia Nazionalaren Kidegoan zerbitzu aktiboan zegoenean Suitzako enpresa bat ikertzeko.
Epaileak Ustelkeriaren kontrako Fiskaltzaren eskaera aintzat hartu du, hala, eta Iberdrola Renovables inputatzea erabaki du (baina ez Ignacio Sanchez Galan buru duen matrizea), Cenyt eta CASESA komisario ohiaren enpresei enkarguak egiteagatik. Ustez, Iberdrola Renovablesek Villarejo kontratatu zuen 2011. urtearen amaieran, Antonio Asenjo Iberdrolako Segurtasun zuzendariaren bitartez, enpresa suitzar bat ikertzeko; izan ere, enpresa horrekin bat egin zuen enpresa elektrikoak Errumanian proiektu batzuk garatzeko eta gatazkak sortu ziren euren artean. Iberdorla Renovablesi eroskeria delitua egotzi diote, eta oraindik ez dago epailearen aurrean deklaratzeko datarik.
Pieza berean, epaileak Repsol eta Caixabank ere inputatu zituen atzo eroskeria delitua eta sekretuak ezagutaraztea egotzita; hori dela eta, bi konpainietako ordezkariek epailearen aurrean deklaratu beharko dute uztailaren 26an, goizeko 10:00etan. Autoaren arabera, bi konpainia hauek Villarejorengana jo zuten, ustez, Del Rivero eta Pemex petrolio enpresa mexikarraren arteko itun bat "zapuzteko" asmoz, Repsol YPFren kontrola bereganatzeko asmoz; Caixabank konpainia horretako akziodun nagusia zen.
Orain arte, hiru konpainietako segurtasun arduradunez gain, Antonio Brufau Repsoleko presidentea eta Isidro Faine La Caixa Fundazioko eta Criteria Caixako presidentea ere ikerketapean ditu epaileak.
Delitutzat jo daitezkeen zantzuen deskribapenean, epaileak dio, espiatuen telefono-deien trafikorako sarbidea izateaz gain, Iberdrola Renovableseko, Repsoleko eta Caixabankeko zuzendariek Villarejori egindako enkarguak konpainien izenean, haien kontura eta beren onurarako egin zirela, eta fakturak, halaber, konpainia horiek ordaindu zituztela. Beraz, Kode Penalaren 31. artikuluaren arabera, beren onurarako enkarguak izanik, erantzukizun penala lukete pertsona juridiko horiek.
