Tubos Reunidosek uztailean SEPItik 112 milioi euro jasotzea espero du

Tubos Reunidosek dagoeneko sinatu ditu SEPIrekin 112,8 milioi euroko laguntza publikoa jasotzeko kontratuak, eta datozen egunetan behin betiko onartuko dutela aurreikusi du.

Tubos Reunidosek Bilbon egin du Akziodunen Batzar Nagusia, eta bertan Francisco Irazusta presidente exekutiboak eta Carlos Lopez de las Heras zuzendari nagusiak enpresaren egungo egoera azaldu dute. Hala, "hobeto" dagoela eta enplegua erregulatzeko aldi baterako espedienteak (ERTEak) aplikatzeari uko egingo diola jakinarazi dute.

Euskal enpresak 112,8 milioiko finantza-laguntza eskatu zion SEPIren bidez kudeatzen den pandemiak eragindako Enpresa Estrategikoen Kaudimenari Laguntzeko Funtsari. Laguntza hori partaidetza-mailegu baten bidez gauzatuko da.

Hirugarren eta laugarren hiruhilekoetatik aurrera enpresaren ekoizpena nabarmen handitzea espero dute, energia elektrikoari eta deskarbonizazioari lotutako proiektuetarako hodiekin, adibidez, findegiak birmoldatzeko edo CO2 biltegiratzeko.

Izan ere, gaurtik aurrera ERTEei uko egingo dietela iragarri dute. Tubos Reunidos Industrial (Amurrio) eta Productos Tubulares (Trapagaran) enpresek ERTE bana zuten onartuta abendutik ekainaren 30era arte, baina Trapagarango lantokiak ez zen aktibatu beharrik izan.

Urteko hirugarren hiruhilekorako ez da eskatuko bi fabriketako batean ere enplegu-erregulazioko espedienterik aktibatzea. Gainera, iaztik geldirik dagoen Estatu Batuetako lantegia urte amaieran jarriko dute martxan.