Konfekoopek kooperatiben balioa nabarmendu du krisi ostea berreraikitzeko

Rosa Lavin Konfekoopeko presidenteak eta Iñaki Nubla zuzendariak euskal kooperatibismoaren 2020ko balantzea aurkeztu dute, eta krisi sanitario eta sozialak eta garraio-kooperatiben integrazioak markatutako urtea honetan "enpresak indartuta atera" direla eta "Euskadiko enpresa-elkarte handienetakoa" bihurtu direla adierazi dute.

Konfekoop Euskadiko Kooperatiben Konfederazioak 1259 kooperatiba biltzen ditu gaur egun, aurreko urtean baino 26 gehiago, guztira 59.000 langile inguru dituzte eta 1,4 milioi bazkide. Enpresa guztien fakturazioa 11.000 milioi eurokoa izan da 2020an, hau da, EAEko BPGren % 6.

Iaz, kooperatiben % 25ek ERTEetara jo behar izan zuten, batez ere jatetxe-, aisialdi- eta kultura-sektoreetakoek, eta pandemiaren garairik gogorrenean fakturazioa % 40ra jaitsi zen, nahiz eta ekitaldiaren amaieran "gorakada txiki bat izan zen, batez ere banaketaren sektoreak izandako gorakada nabarmenagatik".

Rosa Lavinen ustez, telelana, soldatei eustea, hurbileko banaketa-kanalak eta hurbileko merkatuak bilatzea eta lanpostuak birkokatzea bezalako neurriak hartuta eta "lan-malgutasun handiari esker" krisiari eutsi ahal izan diete kooperatiba asko.

Horri esker, euskal kooperatibek emaitza "antiziklikoa" lortu dutela adierazi dute, eta "nahiko datu positiboak" lortu dituztela, egoera zein den kontuan hartuta. Nublaren hitzetan, "2020ak kooperatiben indarrak neurtu ditu" eta ikusi da, hala ere, enpresa berriak sortu direla.

Lavinek eta Nublak eskerrak eman dizkiete administrazioei kooperatiben sektoreari pandemiari aurre egiteko emandako laguntzeagatik, "bereziki" Eusko Jaurlaritzako Gizarte Ekonomiako Zuzendaritzak emandako laguntzagatik, 1,1 milioi euro bideratu baititu hark 376 kooperatiba-enpresa laguntzeko.

Rosa Lavinek, gainera, kooperatiba-enpresen "erresilientzia gaitasuna" azpimarratu nahi izan du, baita kooperatibismoak pandemiaren kolpeari aurre egiteko duen pisua ere: "Kudeaketa parte-hartzaile eta solidarioarekin ekonomia suspertzeko funtsezko eragilea garela erakutsi dugu", esan du.

Helburuak epe motzera

2021erako ezarritako helburuen artean, Nublak azpimarratu du Konfekoopek lanean jarraituko duela konfederazioa Lanbideko Administrazio Kontseiluan sartzea lortzeko, "harrotasunez esan dezakegu Euskal Autonomia Erkidegoko sektorearteko enpresa-erakunde nagusietako bat garela". Lavinen arabera, behin Lanbiden parte hartzeko" inolako oztopo juridikorik ez dagoela egiaztatuta "borondate politikoaren mende" dago erabakia, eta, horregatik, "mailarik gorenean" lantzen ari dira kontua. "Laster parte-hartze hori baieztatzeko moduan" egoteko bere desioa adierazi du presidenteak.

Konfekoopek kooperatiben eta enpleguen kopurua mantentzea edo handitzea izango du helburu nagusi 2021ean. 2021 birsorkuntzaren urtea izango da, Europar Batasuneko Next Generation funtsek finantzatutako proiektuen bidez. Ildo beretik, Konfederazioaren helburua da, Euskadiko Ekonomia eta Enplegua Suspertzeko Berpiztu programan parte hartzea ere.

Halaber, 2021-2024 epeko Plan Estrategikoa martxan jarriko du aurten Konfekoopek.