Haurreskolak Partzuergoak hitzarmena bete ez izana onartu du 'diru faltagatik'

Zorione Etxezarraga Haurreskolak Partzuergoko gerenteak astelehen honetan azaldu duenez, Haurreskolen hezkuntza proiektua "ez da inoiz arriskuan jarri" pandemian zehar, eta sindikatuei erantzun die ordezkapenen alorreko hitzarmeneko akordioak bete ez badira ez dela izan "borondate faltagatik" edo "langileen eskubideak urratu nahi izateagatik", baizik eta Partzuergoaren aurrekontuetan "dirurik ez dagoelako". "Langileentzat ez bazait iristen, nola egingo ditut ordezkapenetarako kontratuak?", galdetu du.

Eusko Legebiltzarreko Hezkuntza Batzordean, Etxezarragak agerraldia egin du, EH Bilduk eskatuta, joan den astean LAB, Steilas eta ELA sindikatuek Haurreskolak Partzuergoan agerraldia egin ostean. Jaurlaritzari "benetako" pausoak eman ditzala eskatu zioten bertan sektoreko langileen lan-eskubideak "ez urratzeko".

Sindikatuek hainbat mobilizazio egin dituzte azken asteotan Hezkuntza Sailari euren aldarrikapenei erantzuna emango dien negoziazio "errealari" aurre egitea eskatzeko.

Sindikatuen eskarien artean, Haurreskoletako langileei eragiten dieten "alde bakarreko" neurriak indargabetzea, Hezkuntza Saileko ordezkari bat negoziazio-mahaietan egotea eta sektoreko lan-hitzarmena "betetzea" daude.

"Aitortzen dut, ez dut aplikatu dirurik ez dudalako"

Etxezarragak azaldu duenez, hitzarmenaren azken negoziazioan, 2018an ordezkapen bat "lehen egunetik" eskatu ahal izatea onartu zen, eta gerentziak "ezin du galdetu behar den ala ez, ezin da kontrastatu matrikulazioarekin edo egun horretako asistentziarekin".

Etxezarragaren ustez, neurriak "atea irekitzen dio ordezkapen amaigabeari" eta Partzuergoaren aurrekontua ezin dela bete uste du. "Nik aitortu egiten dut, ez dut aplikatu dirurik ez dudalako", azaldu du.

Partzuergoko gerenteak gogorarazi duenez, urtarrilaren 27an hartu zuen kargua, eta "ezohiko" erabaki hori "alde bakarretik" hartu duela onartu du, baina aurrekonturik ez dagoela nabarmendu du, "eta ez da inoiz egongo akordioa horrela geratzen bada", gaineratu du.

Hori dela eta, "ez da ez borondate falta, ezta langileen eskubideak urratu nahi izatea ere", azaldu du, baina "Legebiltzarrak onartutako aurrekontuetan ez dago horrela egiteko dirurik", erantsi du. "Hori berriro adostu behar dugu, berriro eseri neurria adosteko", esan die sindikatuei, eta beraiekin esertzeko eta "zintzotasunez adosteko" gogoa agertu du.

Etxezarragak 2021erako Aurrekontuari egindako ekarpenetan, azpiegitura berriak egin baino gehiago, egun dauden Haurreskolak "indartu" egin behar direla esan die Eusko Legebiltzarreko taldeei, "batez ere hirietan, eskaria bertan baitago".