Ekonomia -
Lan gatazka
Bilboestibaren arabera, Bilboko Portuak "trafikoaren erdia" galdu du grebarengatik
Hala, eta "piketeen jokabidearen ondorioz", ezin izan omen dute egin "industriako hornidura operazioen % 90".
agentziak | erredakzioa
Bilboestibak, Bilboko Portuko Estiba eta Desestiba Elkarteak, adierazi du portuko trafikoaren erdia galdu dutela zamaketarien grebarengatik, eta ezin izan omen dute egin "industriako hornidura operazioen % 90a".
Bilboestibak agiri batean azaldu duenez, zamaketarien grebaren lehengo 15 egunetan, Bilboko Portuak 16 zamaontziren eskalak galdu ditu, "% 18 aurreko hamabostaldiaren aldean".
Horren ondorioz "% 46 merkantzia orokor eta % 48 edukiontzi gutxiago" mugitu dituzte, aurreko hamabostaldiarkin konparatuta.
Bilboestibak azaldu duenez, "gatazka sortzen ari den kaltearen erakusgarri da kamioien karga eta deskarga kopuruan izandako beherakada ere, batez beste % 80koa izan baita, eta egun batzuetan % 100ekoa".
Horren harira, ohartarazi du "ekonomian, enpleguan eta portuaren eragin eremuan ondorioak oso larriak" direla. Hala, "piketeen jokabidearen ondorioz"”, ezin izan omen dute egin "industriako hornidura operazioen % 90".
"Merkantzia horien 'bahiketak' arrisku larrian jartzen du enpresen jarduera", salatu du.
