Tecnichapa enpresa bizkaitarreko langileak greba mugagabera deitu dituzte

Tecnichapa Igorreko enpresako Langile Batzordeak greba mugagabea deitu du astelehen honetan enpresaren zuzendaritzak lan-hitzarmen "duina" negoziatzeko duen "borondate eza" salatzeko. Siderurgia sektoreko lantegiak 130 langile inguru ditu, eta Velatia taldearen barruan dago.

LABek jakinarazi duenez, Tecnichaparen zuzendaritzak, "COVID-19ak eragindako beldurra aprobetxatuta, langileen eskubideetan atzera egite a ekarriko luketen akordioak inposatu nahi izan ditu". Uda baino lehenago langile batzordeari "presioa" egin zion malgutasuna eta ordu extren akordioa sina zezan, eta negoziazioa bertan behera uzten saiatu zen, baina langileen ordezkariek argi adierazi zioten ez zutela "langileengan atzera pausorik sinatuko".

Era berean, salatu dute aurreko astean beste proposamen bat helarazi ziotela zuzendaritzari akordio batera iristeko asmoz, negoziazioa urte eta erditik gora luzatzen ari baita, baina beste aldeak errefusatu eta uko egin ziola "kontraproposamen bat egiteari, duela urtebete baino gehiagokoari eutsiz".

"Inposaketa saiakera" horren aurrean, eta "enpresak lan-hitzarmen duina negoziatzeko asmorik ez duela ikusita", langileen ordezkariek greba mugagabea deitu dute. "Zuzendaritzak ez digu beste aukerarik uzten, akordio negoziatu batera iristeko aukera guztiak deuseztatu baititu", adierazi du langile batzordeak.

Sindikatuaren arabera, enpresaren egoera ekonomikoa eta produktiboa "bikaina da", eta ageraian geratzen da hori "Velatiako akziodunek 2019an dibidenduak atera baitzituzten, egiten ditugun aldarrikapenak baino askoz altuagoak, eta enpresan egindako inbertsioak baino askoz diru gehiago". "COVID-19aren eraginaren beldurra erabiltzen badute ere, errealitateak dio enpresaren fakturazio aurreikuspena % 7 hazi dela 2020ko urtarrilaren aldean", gaineratu dute.