Nola eskatu etxetresna elektrikoak eta leihoak berritzeko planeko laguntzak

Etxebizitzetako energia-kontsumoan eragin handia duten ekipamenduak berritzeari begirako laguntzak, Etxetresna Elektrikoen eta Leihoen Renove planetan jasota dauden laguntzak, uztailaren 1ean sartuko dira indarrean eta horietako bakoitzak 2,5 milioi euroko aurrekontua izango du.

Dirulaguntza eskaerak modu telematikoan bideratuko dira, Energiaren Euskal Erakundeak (EEE) berariaz egokitutako aplikazioaren bidez, haren webgunean (eve.eus), eta konkurrentzia prozesuaren bidez emango dira, hau da, dokumentazioa behar bezala beteta eta formalizatuta jasotzen duten hurrenkeran edo ordenan. 

Dirulaguntzak 2020ko ekainaren 30ean Euskadiko Buletin Ofizialean argitaratuko dira, eta uztailaren 1ean sartuko dira indarrean. Aurrekontua amaitzean edo, gehienez ere, 2020ko azaroaren 30ean bukatuko dira.

Kanpaina honekin bat egin nahi duten saltokietako arduradunek eskura izango dute identifikatzeko material ugari, haien dendetan kartel eta eskuorri informatiboak erakutsi eta banatzeko. Dirulaguntzak kudeatzeko onespena ematen duten dendek aldatu beharreko etxetresna elektrikoa erretiratzeko konpromisoa hartu beharko dute. Saltokien zerrenda EEEren web-orrian egongo da, erosleek eskura izan dezaten.

Leihoen Renove Plana

Dirulaguntzaz baliatzeko, leihoek eta ate-leihoek baldintza hauek bete beharko dituzte: etxebizitzaren kanpoko itxituren zati izatea eta energia-eraginkortasun handiko estandarrak edukitzea.

Ezaugarri tekniko nagusiak hauexek dira:

· Leiho eta/edo ate-leiho berriek CE marka izango dute.

· Leiho eta/edo ate-leiho berriek 3 klaseko edo goragoko airearekiko iragazkortasuna izango dute.

· Leiho eta/edo ate-leiho berriek honako ezaugarri termiko hauek izango dituzte gutxienez:

· Metal-arotzerien kasuan:

     · Marko metalikoa, >= 16 mm-ko zubi termikoaren hausturarekin (ZTH).

     · 16 mm-ko edo goragoko beira bikoitza gasdun ganberarekin (% 90 argona, kriptona edo xenona) eta barneko beira isolamendu termiko indartuarekin (ITI) Uv-ren balioa (beiraren transmisio-faktore termikoa) <= 1,0 W/m2K izanik.

· PVCzko, egurrezko edo bestelako materialezko arotzerien kasuan:  

      · 16 mm-ko edo goragoko beira bikoitza aire-ganberarekin eta barneko beira isolamendu termiko indartuarekin (ITI) Uv-ren balioa (beiraren transmisio-faktore termikoa) <= 1,4 W/m2K izanik.

Plana indarrean sartu ondoren egin beharko da instalazioa eta itxitura beiradunen kostuaren % 25eko laguntza izango dute. Etxebizitza eta onuradun bakoitzeko gehieneko zenbatekoa ez da inoiz 1.500 €-tik gorakoa izango.

Leihoen Renove Plana bateragarria izango da helburu bera duten beste plan batzuekin, baldin eta salmentaren azken prezioa (SAP) % 65 gainditzen ez bada.

Etxetresna Elektrikoen Renove Plana

Energia-eraginkortasun handia duten etxetresnak erosteko dirulaguntza eskatu ahal izango dira, betiere tresna zaharrak behar bezala birziklatzea ahalbideratuz. Onuradun bakoitzeko eta etxetresnako gehieneko dirulaguntzak ez du salmentaren azken prezioa (Publikoarentzako Salmenta Prezioa), BEZa barne, % 25 gaindituko, eta pertsona berak ezin izango du dirulaguntza bat baino gehiago jaso etxetresna mota berdinagatik.

Dirulaguntza jaso dezaketen etxetresna elektrikoak hauexek dira:

· A+++ energia-klasea / Hozkailua eta hozkailu-izozkailua / 130 euro gehienez

· A+++ energia-klasea / Izozkailua / 130 euro gehienez

· A+++ energia-klasea / Garbigailua / 130 euro gehienez

· A+++ energia-klasea / Ontzi-garbigailua / 130 euro gehienez

· A+++ energia-klasea / Lehorgailua / 130 euro gehienez

· A++ energia-klasea / Hozkailua eta hozkailu-izozkailua / 100 euro gehienez

· A++ energia-klasea / Izozkailua / 100 euro gehienez

· A++ energia-klasea / Garbigailua / 100 euro gehienez

· A++ energia-klasea / Ontzi-garbigailua / 100 euro gehienez

· A++ energia-klasea / Lehorgailua / 100 euro gehienez

· A+ energia-klasea / Labea / 100 euro gehienez

Renove plan hau ez da bateragarria beste etxetresna elektrikoen plan batzuekin.

Zer-nolako abantaila du izapide telematikoak?

- Izapidea edozein egun eta ordutan egin daiteke.- Ez da beharrezkoa mugitzea eskaera aurkezteko.- Espedientearen egoera noiznahi ezagutzeko aukera dago.

Zer behar da izapide telematikoa egiteko?

Onartutako identifikazio elektronikorako bitartekoren bat eduki behar da. Pertsona fisikoentzat, erabiltzeko errazena B@kQ da, ontzi-jokoa, honako arrazoiengatik:

- Edozein gailutatik erabil daitekeelako (PC, mugikorra, tableta…).- Ez delako beharrezkoa softwarerik instalatzea, ezta nabigatzailea konfiguratzea ere.- Ez delako behar txartel-irakurgailurik.- Interneten identifikatzeko eta dokumentuak sinatzeko aukera ematen duelako.- Legezkoa delako eta guztiz segurua delako.- Doakoa delako.

Non lortu ahal da B@Kq ziurtagiria?

- Osakidetzaren osasun-etxeetan.- KZgunea sareko egoitzetan.- Zuzenean-en bulegoetan.

Atxikitzeko eskaerak elektronikoki sinatu beharko ditu legezko ordezkariak edo establezimenduaren ordezkaritza-ahalordea duenak.

Administrazio-dokumentazioa

· Atxikitzeko eskaera

· IFKaren kopia.

· Sinatzailearen (legezko ordezkaria) NANaren kopia.

· Ahalduntzeko eskrituraren kopia edo ordezkatzeko dokumentu justifikagarria.

· Foru Ogasunean dagozkion ordainketak eginak dituela egiaztatzen duen egiaztagiri eguneratua.

· Gizarte Segurantzan dagozkion ordainketak eginak dituela egiaztatzen duen egiaztagiri eguneratua.