Iaz baino 71 milioi euro gutxiago bildu ditu Arabak lehen lauhilekoan

Urteko lehen lau hilabeteetan, Arabako Foru Ogasunak 502,3 milioi euro bildu ditu, iazko epe berean baino 70,7 gutxiago. Sozietateen gaineko zergan % 14ko jaitsiera izan da, ordainketa atzeratzeko neurriengatik. Beraz, Arabako Ogasunak 5,7 milioi gutxiago bildu ditu. Baina jaitsiera nabarmenena BEZan izan da, % 31 gutxiago bildu baitituzte.

PFEZak % 21,6ko igoera izan du (ia 40 milioi gehiago), Arabako Ogasunak itzulketa gutxiago egin behar izan dituelako. Hala ere, lan-etekinen eta lanbide-jardueren gaineko atxikipenek martxora arte izan duten goranzko joera hautsi egin da. Hala, epigrafe hori % 3,4 jaitsi da, iazko lehen lauhilekoan baino 7,5 milioi gutxiago bildu baitira. Lehen lauhileko zifrak martxoaren erdialdean izan zen jarduera ekonomikoaren beherakada jaso dute.