Funtzionarioen itzulera planifikatu gabe dagoela esan dute sindikatuek

ELA, LAB, CCOO eta UGT sindikatuek kritikatu dutenez, "prebentziorik, plangintzarik eta ezertxo ere egin gabe" itzuli dira EAEko Administrazioko langileak aurrez aurreko lanera.

Eusko Jaurlaritzak ez du "sindikatuekin ezer adosteko borondaterik" agertu, ezta "neurririk oinarrizkoenak" ere, hala nola telelana zabaltzea, COVID-19a detektatzeko probak egitea eta garbiketa zerbitzua indartzea.

"Ondorioak begi bistan ditugu: zentro batzuetan ia ez dago babes-neurririk, garbitzaileek errefortzurik gabe jarraitzen dute, babesik gabe eta lanak gainezka egiten du eta telematikoki lanean ari zirenek beren lanpostuetara itzuli behar izan dute", azaldu dute ohar batean.

Sindikatu horiek, gainera, Andres Zearreta Funtzio Publikoko sailburuordeari atzo "ikuspegi faltsua" eman izana leporatu diote, funtzionarioak euren lanpostuetara nola itzuli ziren azaltzeko, eta gogorarazi dute langile horiek ez diotela inoiz lan egiteari utzi, bulegora joateari baizik.