"Oporretan lan-txandak adostu beharko dira, enkargu garrantzitsuak daudenean"

“Zazpi urtetan lortutako guztia galtzeko arriskuan gaude”. Arantxa Tapia Ekonomiaren Garapenerako sailburuak argi eta garbi esan du Radio Euskadiko Boulevard saioan egindako adierazpenetan. Tapiaren ustez, “tamaina oso handiko egoera kritikoa” dator, 2008. Urteko krisiaren osteko urteetan bizitakoaren antzekoa. Hori dela eta, “eustea” ez da nahikoa, “lehendik aurrean genituen erronkei aurre egin behar diegu”.

Jaurlaritzako sailburuaren iritziz, aurreko krisian ikasitakoari esker, Euskadi hazkundearen bidean “indarrez eta lanaren bidez” itzultzea ekarriko du; “prest gaude, baina gogorra izango da”, azpimarratu du. Hori dela eta, “ahaleginak” egitea eskatu du, kiristik lehen postuetan aterako diren herrialdeen taldean egoteko. “Errekuperazioak ez du ‘V’ itxura izango, Nike markaren logoarena baizik: erorketa sakona eta irteera motela”, adierazi du sailburuak.

Nor aterako da kaltetuen krisi honetatik? “Denok”, esan du Tapiak, baina “kulturan, aisialdian, ostalaritzan eta merkataritzan kolpea handiagoa jaso dute”, zehaztu du. Mugikortasunaren murrizketarekin, aeronautikak eta automozioak ere “arazo handiak izango dituzte, nazioarteko turismoak bezala”. Industriaren erronkak ere aipatu ditu: digitalizaioa eta ingurugiroa.

Koronabirusaren krisiak irakatsi duenaz ere aritu da Arantxa Tapia. Honen harian, Asiako hornitzaileekin horniketa kateak apurtu direla adierazi du. Ondorioz, “gertuago dauden merkatuekin lan egitea oso garrantzitsua izango da, horniketa-kateak apurtuz gero ordezko hornitzaileak behar ditugulako”. Puntu honetan, maskaren edo arnasgailuen kasuak aipatu ditu, “etorkizuneko krisietan” kanpoko merkatuen mende ez egoteko.