Gipuzkoako hamar enpresatik zazpik jarduera geldirik dute

Gipuzkoako hamar enpresatik zazpik, enpleguen % 81 dutenak, beren jarduera partzialki edo erabat etenda dute COVID-19aren krisiaren ondorioz, Adegi Gipuzkoako enpresen elkarteak egindako krisi honen eraginari buruzko azken inkestaren arabera.

Ohar baten bidez, Adegik apirilaren 1ean bidalitako inkestaren emaitzen berri eman du, enpresek egun duten jarduera mailari buruzko galdera bakarrarekin.

Apirilaren 1etik 6ra bitartean, guztira, 25.000 langile baino gehiago dituzten enpresen 397 erantzun jaso dituzte, Gipuzkoako sektore pribatuko soldatapekoen % 11 inguru. Patronalaren arabera, erantzun duten enpresen ia % 54 industriakoak dira, % 6,5 eraikuntzakoak eta ia % 40 zerbitzuen sektorekoak (batez ere, enpresentzako zerbitzuak).

Enpresen % 42k (enpleguen % 59), jarduera partzialki etenda dute (aldi baterako enplegu-erregulazioko espediente partzial batengatik edo gutxieneko jarduera bati eusteagatik); % 28k  (enpleguen % 22), jarduera erabat etenda dute; eta hamar enpresatik hiruk jarduera normala dute, aurrez aurrekoa, telelana edo mistoa egiten baitute.

Gainera, enpresen % 6k (enpleguaren % 5 baino gehixeago) jarduera normala dute, aurrez aurrekoa, eta enpresen % 16,5ek (enpleguen % 6) normala dute, baina telelanaren bidez. Azkenik, enpresen % 7k jarduera mistoa dute (enpleguen ia % 7).

Adegiren inkestaren arabera, "jarduera maila normala dutela adierazten duten enpresetako askok beren negozio maila asko murriztu zaiela esan dute". Sektoreka, "eraikuntza eta Merkataritza eta Ostalaritza (% 96 eta % 91, hurrenez hurren), metaleko industria (% 83) eta gainerako industria (% 67) dira kaltetuenak.

Beste muturrean, berriz, enpresentzako zerbitzuetan (enpresen % 65) eta, neurri txikiagoan, gainerako zerbitzuetan (enpresen % 47,5) dago jarduera normal handiena. Bi kasuetan, telelana da nagusi, aurrez aurreko jardueraren aldean.

"Enpresa ertainak dira kaltetuenak jarduera partzialki edo erabat etenda baitute (enpresen % 81 eta enpleguen % 82), eta ondoren enpresa handiei eragiten die (enpresen % 67 eta enpleguen % 85). Enpresa txikiei ere eragiten die (enpresen % 66 eta enpleguen % 73)", baina "haien artean ez dago gehiegizko alderik, enpresentzako zerbitzuen sektorean izan ezik", Adegiren esanetan.