Pandemiak gastu publikoa doitu beharra eragingo duela ohartarazi du Azpiazuk

Koronabirusak euskal ekonomian izango duen eragina "nahiko negatiboa" izango dela ohartarazi du Pedro Azpiazu Eusko Jaurlaritzako Ogasun eta Ekonomia sailburuak, eta, ondorioz, "doitzeak" eta "berregituraketak" egin beharko direla gaineratu du, gastu publikoa lehentasunetara bideratu ahal izateko. Lehentasunen artean, herritarren osasuna eta langileei eta enpresei zuzendutako laguntzak aipatu ditu.

Bideokonferentzia bidez emandako prentsaurrekoan, Jaurlaritzak bono iraunkorrak berriro aterako dituela iragarri du, eta onartu egin du COVID-19aren krisiak Euskadiko ekonomian izan dezakeen eraginak "kezkatu" egiten duela.

Ogasun sailburuaren ustez, momentu hauetan pandemiak ekonomian izan dezakeen eragina zifretan adieraztea "espekulazio" hutsa litzateke, egoera "ezezaguna" eta aldakorra bizi dugulako.

Hala ere, Ogasun saila aurreikuspen "serio eta zehatzak" eman ahal izateko lanean dagoela azpimarratu du. Era berean, Azpiazuk gogora ekarri du inork ez duela pandemiaren ondorio ekonomikoen inguruko zehaztasunik eman, baina argi dauka Euskadiko ekonomian eragina "nahiko negatiboa" izango duela.