LABek oinarrizkoa ez den jarduera ekonomiko guztia etetea eskatu du

LAB sindikatuak osasun krisi egoera honetan lanera joan direnen osasuna arriskuan jartzea egotzi die Eusko Jaurlaritzari eta Nafarroako Gobernuari, eta "oinarrizko zerbitzua ez den jarduera ekonomikoa gelditzea" eskatu du, beharrezko zerbitzua eskaintzen ari direnentzat "segurtasun osoz lan egin dezaten beharrezko prebentzio neurriak" exijitzeaz gain.

Xabier Ugartemendia Ekintza Sindikaleko eta Negoziazio Kolektiboko idazkariak 'streaming'ez emandako prentsaurrekoan azaldu duenez, "eredugarria" da euskal herritarren jokabidea, krisiaren aurrean eskatutako "ardura pertsonala esfortzuarekin" egiten ari direlako, baina Jaurlaritza, Nafarroako Gobernua eta patronalak "erabateko arduragabekeriaz" jokatzen ari dira, "osasuna lehenetsi beharrean, jarduera ekonomikoa" lehenesten dutelako.

Horren harira, "edozein herritar kutsatzeko arriskuan" jartzen ari direla kritikatu du, eta galdetu du ea "zertarako balio duen jai egunetan etxean egotea, gero lanera joan eta familiak kutsatzeko arriskua badago".

Hori horrela, industria sektoreko langileen "kezka" azalerazi du LABen ordezkariak, eta gaineratu duenez, patronalari "langileen osasuna eta herritarrena ez zaio axola, eta helburu bakarra aberastasuna eta etekina dira". "Gobernuak patronalaren aginduetara daude, eta mekanismo guztiak jarri dituzte martxan industria jarduerak aurrera jarrai dezan", berretsi du.

Horren esanetan, horrela bakarrik uler daiteke Sidenor, Tubacex edo Mercedesek "prebentzio neurriak bete gabe langileak lan egitera behartzea". "Salaketa asko aurkeztu ditugu, baina langileak kutsatzera bidaltzeko erabakiari eusten diote gobernuek", adierazi du.

Bestalde, "oinarrizko" zerbitzua ematen ari diren langileek ere ez dituztela "beharrezko prebentzio baliabideak, ez metro eta erdiko distantzia, ez maskarillarik, ez xaboirik" salatu du. "Osasunaz ari gara, etxeko laguntzaz, zahar etxeetako langileez, anbulantzietako langileez, garraiolariez eta beste langile askoz", azpimarratu du.