Lakuntza: "Greba orokorra deitzeko soberako arrazoiak daude"

ELA sindikatuko idazkari nagusi Mitxel Lakuntzak esan duenez, urtarrilaren 30eko greba orokorra deitzeko "soberako arrazoiak daude". Radio Euskadiko 'Boulevard' saioan egin dioten elkarrizketa batean adierazi du, halaber, greba horrek jarraipen oso handia izango duela.

ELAko idazkari nagusiak azaldu du 1.200 Enpresa Batzordek egin dutela bat grebarekin; zenbait enpresa handiren batzordeek ere babestu egin dute, Mercedesekoak kasu. Lakuntzak, halaber, aldeztu du mobilizaziorako nahikoa arrazoi daudela: pentsio duinak, soldatak, eta prekarietatearen aurkako borroka aipatu ditu.

Mitxel Lakuntzak gogor gaitzetsi du Iñigo Urkullu lehendakariak uko egin izatea greba deitu dutenekin biltzeari. Esan duenez, "oso larria da lehendakariak arrazoia ematen dienekin bakarrik hitz egitea". ELAko idazkari nagusiaren hitzetan, "autoritarismoaren politika” dago, "demokraziaren aurkakoa".