Iberdrolako segurtasun arduraduna inputatuta, Villarejorekin egindako kontratuengatik

Manuel Garcia Castellon Auzitegi Nazionaleko epaileak Antonio Asenjo Iberdrolako segurtasun arduraduna inputatu du asteazken honetan, ustez enpresa horrek Jose Manuel Villarejo komisario ohia kontratatu zuelako Florentino Perezen jabetzakoa den ACS konpainiari espioitza lanak egiteko.

EFE albiste-agentziak aipatutako iturri judizialek baieztatu dutenez, ustez Iberdrolak Villarejoren enpresei egindako kontratuak ikertzeko irekita dagoen Tandem auziko 17. piezaren baitan ikertu gisa deklaratzera deitu nahi du epaileak Iberdrolako segurtasun arduraduna, eroskeria eta sekretuak agerraraztea leporatuta.

Testuinguru horretan, abenduaren 3an eta 4an, Auzitegi Nazionaleko epaileak Iberdrolarekin sinatutako ustezko kontratuen inguruan galdekatuko ditu Villarejo bera eta Rafael Redondo abokatua.

Duela aste batzuk, auzi horretan akusazio partikular gisa aurkezteko erabakia hartu zuen Florentino Perez ACSko eta Real Madrileko presidenteak, zenbait hedabide digitalek xantaia egiteko eta konpainia elektrikoaren administrazio-kontseiluan egoteko nahia geldiarazteko asmoz Iberdrolak Villarejo kontratatu zuela zabaldu ostean.

Ohar batean, ACSk azaldu zuen ekintza horien atzean egongo liratekeen erantzuleen aurka neurri penalak eta zibilak hartzen saiatzen ari direla: "Horien artean, Iberdrolako presidentea, Villarejo komisario ohia eta delituzko jarduera horretarako bitarteko gisa erabili ahal izan diren hedabideak egon litezke".

Urriaren azken astean, Iberdrolak espioitza-lan horiek kontratatu ote zituen ikertzeko pieza sekretu bat ireki zuen Garcia Castellon epaileak, auziaren baitan.

Iberdrolak epaile bat zelatatzeko Villarejo kontratatu zuela argitaratu ondoren ireki zuen pieza hori. Horren arabera,  konpainia elektrikoaren interesen aurkako plataformetan infiltratzeko agindua eman zioten, Cofrenteseko zentral nuklearreko enpresa batzordeko kideak jipoitzeko edota enpresaren kudeaketarekin jarrera kritikoa agertu zuen akziodun bat ikertzeko.

Iberdrolak aitortu zuen 2018ko azaroan irekitako bi barne-ikerketek eta 2019ko uztailean irekitako beste batek ondorioztatu zutela Villarejo kontratatu zutela 2004. eta 2017. urteen artean,  Segurtasun Korporatiboko Zuzendaritzarekin lotutako 17 zerbitzu arruntetarako.

Gainera, Iberdrolaren arabera, lan horiek kontratatzeko eta ondoren ordaintzeko prozesuan konpainia elektrikoaren barne kontrol eta prozedura guztiak behar bezala bete zirela ondorioztatu zuten, Ignacio Sanchez Galan buru zenean.

Urriko bigarren astean, konpainia energetikoak barne ikerketa "berri eta sakona" abiatzea erabaki zuela iragarri zuen, Villarejori buruz argitaratutako azken informazioen egiazkotasuna argitzen saiatzeko eta konpainiaren kode etikoa urratu ote zen argitzeko.