Ekonomia -
KPI-AREN DATUAK
Urte arteko inflazioa % 0,5ekoa izan da EAEn eta % 0,7koa Nafarroan urrian
Zehazki, jantzien eta oinetakoen prezioak igo dira gehien Nafarroan. Prezioen beherakada nabarmenena, berriz, aisialdian eta kulturan izan da.
Agentziak | Erredakzioa
Kontsumorako Prezioen Indizearen (KPI) urte arteko inflazio-tasa % 0,5 hazi da urrian Euskal Autonomia Erkidegoan (EAE), aurreko hilabetean izandako igoera bera, eta prezioak % 1,1 igo dira iraileko datuekin alderatuta.
Hala, Espainiako Estatistika Institutuak ostegun honetan kaleratutako kontsumorako prezioen indize aurreratuaren arabera, inflazio-tasak ez du aldaketarik izan EAEn, irailekoa ere % 0,5ekoa izan baitzen; prezioak, berriz, % 1,3 igo dira urtarriletik urrira bitartean.
Nafarroan, prezioak % 0,7 igo dira urrian, aurreko hilabetearekin alderatuta, eta urte arteko inflazio-tasa zortzi hamarren jaitsi da urtea hasi zenetik, % 0,5eraino.
Zehazki, jantzien eta oinetakoen prezioak igo dira gehien Nafarroan (% 8). Testuinguru horretan, etxebizitzak (% 1,3), elikagaiak eta alkoholik gabeko edariak (% 1) eta tresneriak (% 0,4) ere garestitu dira.
Prezioen beherakada nabarmenena, berriz, aisialdian eta kulturan izan da (% 1,3). Ondoren, irakaskuntza, hotelak, kafetegiak eta jatetxeak eta garraioa daude (% 0,3). Gainera, alkoholdun edariak eta tabakoa, medikuntza eta garraioa % 0,1 merkatu dira.
Espainian, KPIak % 0,1eko igoera izan du urrian, irailean bezala, argindarraren eta frutaren prezioaren gorakadaren eraginez. Dena dela, erregaien eta pakete turistikoen prezioen beherakadak igoera hori orekatzea lortu du.
