Ekonomia -
Bizkaia
Metalgintzako sindikatuek soldatetan mugimenduak egiteko eskatu diote patronalari
Lan-segurtasun eta osasun arloko proposamen berriak aurkeztu dituzte astelehen honetan, patronalaren "mugikortasun falta" dela eta.
Agentziak | Erredakzioa
ELA, CCOO, LAB, UGT, ESK, CGT, USO eta CNT sindikatuek Bizkaiko Metalgintzako soldaten eta subrogazioaren arloan mugimenduak eskatu dizkiote Bizkaiko Metaleko Enpresen Federazioari, asteazken honetan egingo duten bilerari begira. Astelehen honetako bileran sindikatuek laneko segurtasun eta osasun arloko proposamen berriak aurkeztu dizkiote patronalari, enpresaren "mugikortasun falta" dela eta, CCOOk jakitera eman duenez.
Sindikatuen ustez, Bizkaiko Metalgintzaren egoerak "premiaz behar ditu langileen osotasunerako koraza gisa balio duten neurriak".
Alde horretatik, CCOO Euskadik adierazi duenez, metalaren sektoreak sektoreko hitzarmenaren inguruan dituen "beharrezko eguneratzeen" artean, laneko segurtasun eta osasunarena dago, "aurreko urteetan izandako istripu-tasak gora egin baitu".
"Egoera horren ondorioz, patronalak neurriak hartzea ezinbestekoa da, sektoreko enpresa guztietako lanpostuetan segurtasuna eta osasuna ziurtatzeko", ohartarazi du.
Ildo horretan, sindikatuek patronalari eskatu diote aldi baterako ezintasunaren arloan proposatzen duen murrizketa ken dezala, "langileak bajan daudenean horiek neurririk gabe kaleratzea eragin baitezake", eta utzi dezala artikulu hori 2008-2011 hitzarmenean idatzita geratu zen bezala.
Bestalde, sindikatuek ziurtatu dute mobilizazioei eutsiko dietela, eta gaur arratsaldean, 17:30ean, elkarretaratzea egingo dute ITPren aurrean, Zamudion.
