Euskadiren irudi turistiko berriak lelo eta doinu propioa izango ditu

Euskadiren irudi turistiko berriak #Basquexperience leloa izango du gaurtik aurrera, eta "hurbileko espazio batean aukera ugari eskaintzen dituen" lurraldearen irudi turistikoa bateratzeko doinu propioa izango du, Sonia Perez Ezquerra Turismo, Merkataritza eta Kontsumo sailburuak aurkezpenean adierazi duenez.

Euskadiko turismoaren "une ona" azpimarratu du Perez Ezquerrak, eta aprobetxatzeko deia egin du, "gure irudia sendotzeko". "Euskadik izen propioa eta melodia propioa merezi ditu, bere izaera, sustraiak, oraina eta etorkizuna erakusteko", ziurtatu du.

Hori dela eta, berezko sintonia sortu du Jaurlaritzak "Euskadik nolako soinua duen gogoratzeko; antzinako tradizioa eta berrikuntza kosmopolita gogoratzeko; itsasoa, gatza, basoetako goroldioa eta bailaretako berdea gogoratzeko; kulturarekin elkartutako industrien burdina eta kea gogoratzeko, euren sustraiekin leialak diren abangoardiako hiriak gogoratzeko; kalitatezko produktuak, lapikoen eta saltsen lurrina, eta sukaldeko delicatessenak gogoratzeko. Euskadik bere soinua, usaina eta zaporea ditu, Esperientzia paregabea da", adierazi du.

Euskadiren aberastasunaz gozatzen duten bisitariek bisita-liburuetan utzitako oharren grafian oinarritutako #Basquexperience leman islatzen da esperientzia-izaera hori.

Turismo Sailak barne-merkatua bereziki sustatzeko EiTBrekin elkarlanean egin dituen hainbat telebista-programatan agertuko da irudi berri hori. EiTBko zuzendari nagusi Maite Iturbe sailburuarekin batera egon da aurkezpenean.