IAG (Iberia) konpainiak Air Europa erosi du 1.000 milioi euroren truke

Iberia buru duen IAG taldeak Air Europa hegazkin-konpainia erostea adostu du Globaliarekin, 1.000 milioi euroren truke. 2020ko bigarren seihilekoan itxiko dute operazioa, eta akordioak Espainiako bi hegazkin-konpainia handienak batzea ekarriko du, International Airlines Group taldeak astelehen honetan jakitera eman duenez.

IAG taldeak 40 milioi euro ordainduko lituzke dagozkion arautze-baimenak lortzen ez badira eta aldeetako batek akordioa gauzatzea saihesten badu.

Zehazki, British Airways, Iberia, Vueling eta Aer Lingus konpainiek osatzen dute IAG taldea. Ohar baten bidez azaldu duenez, erosketa honekin Madrilen duen operazio-zentroa “benetako aurkari bihurtuko da Europako lau aireportu handienentzat” (Amsterdam, Frankfurt, Londres-Heathrow eta Paris-Charles de Gaulle).

Horrez gain, Latinoamerika eta Karibe Europako merkatuan lider gisa kokatzea ekarriko du, eta kostu eta diru-sarrerei dagokienez sinergia potentzial esanguratsuak lortzea.

Hasiera batean, Air Europak bere markari eutsiko dio, eta sarrera-zentro autonomo gisa sartuko da Iberiako egituran, Luis Gallego Iberiako kontseilari delegatuaren zuzendaritzapean.

IAG taldearen arabera, akzio bakoitzeko etekina lehendabiziko urtean handituko da, eta inbertitutako kapitalaren gaineko errentagarritasuna operazioa itxi eta laugarren urtera igoko da.

"Air Europa eskuratzeak konpainia lehiakor eta errentagarri bat gehitzea dakarkio IAGri, Madril Europako ‘hub’ nagusi bihurtuz eta taldeak Hego Atlantikoaren lidergoa lortzea ahalbidetuz, eta, horrela, gure akziodunentzat finantza balio gehigarri bat sortuz", adierazi du Willie Walsh taldeko kontseilari delegatuak.

Horrela, IAGko kontseilari delegatuak taldearen "ibilbide oparoa" nabarmendu, eta Air Europa erosi izana konpainiarentzat oso estrategia garrantzitsua dela gaineratu du.

Javier Hidalgo Globaliako kontseilari delegatuaren iritziz, Air Europa IAG taldean sartzeak konpainiaren oraina eta etorkizuna indartzea dakar, eta aurrerantzean azken urteetan jarraitutako bideari etsiko diotela gaineratu du.  

"Akordio horren ostean, Madril Europako beste 'hub' batzuekin lehiatu ahal izango da baldintza berdinetan, Europatik Latinoamerikara doazen ibilbideetan posizio hobea izango du eta Asia eta Latinoamerikaren arteko lotura bihurtzeko aukera izango du", Gallegoren hitzetan.

Operazioa justifikatzeko, Air Europa Espainiako hegazkin-konpainia pribatu garrantzitsuenetako bat dela nabarmendu du IAGk, 69 jomuga lotzeko hegaldi erregularrak eskaintzen baititu Estatu mailan eta nazioartean, Latinoamerikara, AEBra, Karibera eta Afrika iparraldera doazen ibilbideak barne.

2018an, Air Europak 2.100 milioi euro fakturatu zituen, 100 milioi euroko irabaziak lortu zituen eta 11,8 milioi bidaiari garraiatu zituen 66 hegazkinekin.