Xabier Iturbe izango da Euskalteleko presidente berria

Xabier Iturbe Kutxabankeko presidenteordea eta Kutxako presidente ohia izango da aurrerantzean Euskaltel Taldeko presidentea. Konpainiaren Administrazio Kontseiluak aho batez hartu du erabakia, Radio Euskadik baieztatu duenez.

Alberto Garcia Erauzkinek utzitako tokia hartuko du Iturbek. Zegona inbertitzaile britainiarra Euskalteleko akziodun nagusia bilakatu ostean, Jose Miguel Garcia –Jazzteleko zuzendari ohia- izendatu zuten kontseilari delegatu eta harrezkero boterea galdu zuen konpainiaren zuzendaritzan. Hala, gaur aurkeztu du dimisioa Erauzkinek.

Erauzkin 2000. urtean iritsi zen Euskaltelera. Besteak beste, zuzendari nagusi eta presidente exekutibo karguak izan ditu, eta berak atera zuen konpainia burtsara. Euskaltelek enpresari egindako ekarpena eskertu dio.

Bestalde, Euskaltelek jakinarazi du 19 milioi euroko irabazi netoa izan duela urteko hirugarren hiruhilabetekoan, iazko epe berean baino % 7,4 gehiago.